DOTr ug Probinsiya sa Sugbo nilusad sa Tabang Pangbyahe Program

CEBU, Philippines — Opisyal na nga gilusad sa Department of Transportation (DOTr) ug sa Cebu Provincial government ang unang provincial government-led service contracting program alang sa pampublikong transportasyon sa nasud diin nagtimaan kini sa usa ka dako nga lakang sa pagpauswag sa pampublikong serbisyo sa transportasyon samtang gisuportahan ang mga operator ug drayber sa public utility vehicles (PUVs).

Ang programa gitawag og “Tabang Pangbyahe Program” pormal nga gipaila pinaagi sa pagpirma sa memorandum of agreement (MOA) tali sa DOTr, Land Transportation Franchising and Regulatory Board (LTFRB) ug sa kagamhanan sa Probinsiya sa Sugbo sa Cebu South Bus Terminal niining ulahi lang.

Kini ang unang programa nga gipangulohan sa usa ka provincial government diin ang DOTr naghatag og P20 milyones nga pundo ubos sa net service contracting modality.

Tumong sa programa ang paghatag og pinansiyal nga tabang sa mga operator ug drayber sa PUV samtang gisiguro nga adunay kasaligan, luwas, ug dali ma-access nga pampublikong transportasyon, ilabina sa subling pagbukas sa klase.

Ubos sa kasabotan, ang DOTr, LTFRB ug ang kagamhanan sa Probinsya sa

Sugbo magpatuman sa service contracting program aron dasigon ang mga bus operator nga moserbisyo sa mga rota nga kulang pa og sakyanan sa tibuok probinsiya.

Ang mga apil nga bus operator makadawat og insentibo apan kinahanglang mosunod sa standards sa provincial government.

Lakip niini ang pagbutang og GPS devices nga konektado sa local command center alang sa real-time monitoring, pagmentinar sa kalimpiyo ug sanitasyon paggamit og low-floor buses alang sa persons with disabilities (PWDs), pagsiguro sa maayo nga air-conditioning system ug strikto nga 60-passenger nga walay standing policy. — /BDB (BANAT NEWS)