P10M shabu nasakmit

CEBU, Philippines — Mokabat sa 1.55 ka kilo sa gituohang shabu nga adunay standard drug price nga P10.54 milyon ang nasakmit sa duha ka managlahing buy-bust operation nga gipahigayon sa Cebu City Police Office (CCPO) sa gabii sa Hunyo 26 ug kadlawon sa Hunyo 27.

Sa unang operasyon nga gihimo alas 11:10 sa gabii sa V. Rama Avenue, Barangay Calamba, nadakpan si James Eduard Nabua, alyas "James," 21 anyos, nga giila sa kapulisan isip High-Value Individual (HVI).

Ang operasyon nga gipahigayon sa City Intelligence Unit (CIU)-CCPO uban sa koordinasyon sa Philippine Drug Enforcement Agency (PDEA) misangpot sa pagkasakmit sa 550 gramos nga gituohang shabu nga nagkantidad og P3.74 milyon.

Kapin usa ka oras ang milabay, alas 12:20 sa kadlawon sa Hunyo 27, nadakpan usab sa laing buy-bust operation sa Sitio San Isidro, Barangay Mabolo si Cristito Flores Tumampo Jr., alyas "Jun-Jun," 26 anyos, usa usab ka High-Value Individual.

Ang operasyon nga gipahigayon sa Station Drug Enforcement Unit (SDEU) sa Police Station 4, CCPO uban sa PDEA niresulta sa pagkasakmit sa 1,000 gramos nga gituohang shabu nga nagkantidad og P6.8 milyones.

Narekober usab sa mga operatiba ang buy-bust money, boodle money, usa ka sling bag nga gigamit isip sudlanan sa droga, ug P950 nga gituohang halin sa ilegal nga negosyo.

Ang duha ka operasyon gihimo ubos sa balidong PDEA pre-operation coordination isip kabahin sa gipakusgang kampanya sa gobyerno batok sa ilegal nga droga.

Ang duha ka mga suspek nag-atubang karon og kasong paglapas sa Sections 5 ug 11, Article II sa Republic Act 9165 o ang Comprehensive Dangerous Drugs Act of 2002.

Sa kinatibuk-an, ang sunod-sunod nga anti-drug operations sa CCPO misangpot sa pagkasakmit sa 1.55 ka kilo sa gituohang shabu nga adunay kinatibuk-ang standard drug price nga P10.54 milyon, nga giisip sa kapulisan nga dakong hampak batok sa operasyon sa ilegal nga droga sa Cebu City. (BANAT NEWS)