Gitay-og og 7.8 nga linog

CEBU, Philippines — Ubay-ubay nga mga tawo ang nakalas sa nagkalain-laing dapit sa Sarangani Province ug Davao Del Sur tungod sa pagtay-og sa 7.8 magnitude nga linog kagahapon sayo sa buntag nga nakapahugno og ubay-ubay nga mga buildings ug pagkaguba sa daghang panagatan tungod sa dala niining tsunami.

Dali-daling niresponde ang nagkadaiyang emergency personnel sa nagkalain-laing local government units samtang nangabot sab ang gikan sa nagkalain-laing rehiyon apil na ang nasudnong ahensiya para tabangan ang mga apektado.

Si Presidente Ferdinand Marcos Jr.  mimando dayun sa pagkanselar sa tanang lebel sa klase sa mga tinun-an sa mga apektadong lugar didto sa Mindanao ug gimandoan tanang mga ahensiya sa gobiyerno nga molihok dayun aron pagtabang sa mga naapektahan.

Sa General Santos City, ubay-ubay nga mga buildings ang nangahugno ug dunay mga tawong nakalas human nadat-ogan sa mga debris.Gibanabanang moabot na og 31 ka tawo ang nakalas samtang sobra 134 ang nangaangol ug daghan pa ang na-missing.

Apil ani ang fastfood chain sa General Santos City nga nahugmak gyud tibuok building ug sa Matanao National High School nga usa gyud ka building sa eskuylahan ang nahapla samtang nagtan-aw sa gawas ang mga estudyante ug mga magtutudlo. Paghuman sa magnitude 7.8, ang Philvocs dali dayung nipagawas og warning sa publiko bahin sa posibleng mga aftershocks ug tsunami tungod kay hasta ang ilawom sa dagat natay-og sa maong linog. Matud pa sa Philvolcs alas 7:37 a.m. nahitabo ang linog sa 33 kilometros ang gilawmon sa yuta diha sa  32 kilometers south, 4 degrees west sa Maasim, Sarangani.

Gidugang sa Phivolcs nga ang maong linog nagagikan sa paglihok sa Cotabato Trench.

"This is also the structure responsible for the 1976 Moro Gulf earthquake that caused large tsunamis and many casualties,"  sumala pang Winchelle Ian Sevilla, chief sa Phivolcs Seismology Division.

Ang Pacific Tsunami Warning Center nipagawas og advisory kagahapon sa posibleng pagtumaw sa tsunami sa kabaybayonan sa nasud, sa Indonesia, Palau, Taiwan ug Papua New Guinea. Ang Philippine Coast Guard District Southeastern Mindanao mipasuspenso sa tanang biyahe sa dagat sa Davao Occidental tungod sa tsunami warning, samtang ang Civil Aviation Authority of the Philippines temporaryong nisuspenso sa operasyon sa General Santos City Airport tungod sa linog ug tsunami.

Pilipinas pirmeng dunay mga linog kada adlaw nga dunay nagkalain-laing gikusgon tungod kay nagpatong kini sa Pacific Ring of Fire.  Sumala pa sa Malacañang dunay paigong nakaandam nga mga hinabang ang gobiyerno para sa relief operations. Samtang daghang mga panagatan ang nangaguba tungod pagtumaw sa tsunami diha sa Maasim,  Kiamba pulos sa Sarangani; Kalamansig, Sultan Kudarat; Mati City, Davao Oriental; Zamboanga City ug Tandag City, Surigao del Sur.

Si Japanese Prime Minister Takaichi Sanae ni post sa X ug nipadangat dayun ug pahasubo sa mga pamilya nga dunay nakalas sa Mindanao.

Matud pa niya ang ilang nasud: "stands ready to provide all possible assistance" sa Pilipinas.