Ylanan girelibohan

CEBU, Philippines — Girelibohan sa iyang katungdanan ang acting director sa Cebu City Police Office (CCPO) nga si Police Colonel George V. Ylanan kagahapon, Hunyo 8, 2026.

Gitapos ang iyang serbisyo atol sa tradisyonal nga Monday Flag Raising Ceremony sa Camp Sergio Osmeña Sr., Cebu City.

Sa iyang pamahayag, matod ni Ylanan nga iyang gihatag ang tibuok niyang kusog ug serbisyo alang sa Cebu City ug nagpasalamat sa mga sakop sa CCPO.

“I did my best for Cebu City. To the men and women of the Cebu City Police Office, daghang salamat,” matud niya.

I-reassign kini sa Regional Comptrollership Division sa Police Regional Office 7 (PRO7), usa ka unit nga nagdumala sa budget, pundo, accounting, ug uban pang administratibong buluhaton sa pulisya sa Central Visayas.

Si Ylanan nagsilbi isip CCPO director sulod sa walo ka bulan, diin iyang gipalig-on ang kalinaw ug kahapsay, police visibility, ug koordinasyon sa mga lokal nga opisyal ug barangay sa anti-criminality drive sa siyudad.

Sa pagkakaron, wala pa gipahibalo kinsa ang mopuli sa iyang pwesto. Mitambong sa maong kalihokan si Cebu City Mayor Nestor Archival isip guest of honor, uban si City Councilor Paul Labra II.

Sa iyang mensahe, nagpasalamat si Archival kang Ylanan ug giila ang iyang serbisyo sa pagpalig-on sa peace and order sa siyudad.

“Gikan sa katawhang Sugboanon, daghang salamat, Col. Ylanan, sa imong maayong pagdumala ug matinud-anong serbisyo,” matud ni Archival, ug nanghinaut sa iyang kalampusan sa sunod nga tahas.

Si Ylanan, gradwado sa Philippine National Police Academy (PNPA) Class 2002 ug lumad sa Barangay Labangon, Cebu City, nakatapos og Computer Engineering sa University of San Carlos.

Sa wala pa siya nahimong CCPO chief, nagkupot siya og lain-laing posisyon sa Philippine National Police, lakip ang Regional Civil Security Unit 7 (RCSU-7) sa PRO7.

Atol sa maong kalihokan gipasidunggan sab sa Police Regional Office 7 (PRO7) ang pipila ka mga polis tungod sa ilang kalampusan sa operasyon ug serbisyo publiko sa Central Visayas. (BANAT NEWS)