Nanghulga, namato sa silingan gipadakop

CEBU, Philippines — Lalaki nga nanghulga ug namato sa iyang silingan diha sa Sitio Centro, Barangay Cogon, Dakbayan sa Naga gidakop niadtong Lunes sa hapon, Hunyo 1, 2026.

Giila sa mga otoridad ang suspetsado nga si alyas “Samson,” 34, nga residente sa maong dapit.  Ang iyang biktima, iyaha rang kaliwat nga giila nga si alyas “Samuel,” 62-anyos.

Subay sa imbestigasyon ni Police Sergeant Jake Catane, nasayran nga ang biktima ug suspetsado naglalis mahitungod sa mga tools nga gamitonon sa pagpamanday. 

Gikatahong gipasanginlan sa suspetsado ang biktima nga maoy nanghilabot sa iyang personal nga kinabuhi ug nanaway sa iyang pamilya.   Nisamot kainit ang ilang panaglalis ug sa kasuko sa suspetsado iyang gihulgang patyon ang biktima.

Tungod ani daling misulod sa ilang balay ang biktima uban sa iyang mga anak, apan padayun sa paghulga kanila ang suspek nga nagdaladala og bunal ug gibato ang ilang atop.

Ang mga opisyal sa barangay misulay unta sa pagbadlong sa suspetsado  apan wala ni nipatuo maong nanawag sila g polis ug ilaha ning gidakop. — Cheny R. Labrador, CNU-Main Intern/IBM BANAT NEWS