MARINA magmonitor sa mga shipping company bahin sa pletehan
CEBU, Philippines — Ang Maritime Industry Authority-7 (MARINA-7) nagpahigayon og dayalogo uban sa mga domestic shipping operator niadtong Mayo 26 aron hisgutan ang mga kabalaka sa publiko bahin sa giingong dili makatarunganong pagsaka sa pamasahe sa mga pasahero sulod sa iyang area of responsibility. Gitambongan ang maong miting sa mga representante gikan sa 28 ka shipping company, lakip ang mga opisyal sa kompanya ug mga awtorisadong personnel sa management.
Matud sa MARINA-7, ang dayalogo gipahigayon human sa daghang reklamo nga ilang nadawat may kalabotan sa pagtaas sa pasahe nga gipatuman sa mga domestic shipping operator.
Giila sa ahensya nga ang passenger passage rates sa domestic shipping industry dili na kontrolado sa gobyerno o deregulated ubos sa Republic Act No. 9295, nga nailhan usab isip Domestic Shipping Development Act of 2004.
Apan, gipadayag sa MARINA-7 nga nagpabilin kini nga adunay gahum sa pagpangilabot kon adunay talagsaong mga kahimtang nga makaapekto sa interes ug kaayohan sa publiko.
Gihisgutan usab sa ahensya ang nagpadayong krisis sa Middle East ug ang epekto niini sa kalibutanong presyo sa krudo ug sa operasyon sa shipping industry isip mga hinungdan nga mahimong magkinahanglan og aksyon gikan sa regulasyon.
Gisubli usab sa MARINA-7 ang pagpatuman sa Advisory Nos. 2026-10, 2026-15, 2026-17-A, ug 2026-23, nga naglatid sa mga contingency measure aron mapakunhod ang epekto sa krisis sa Middle East ngadto sa domestic shipping sector.
Ang maong mga advisory nagtakda usab sa maximum Required Rate Adjustment (RRA) nga kinahanglang sundon sa mga shipping operator sa pagpatuman sa pagtaas sa pasahe.
Sumala sa MARINA-7 sa ilang Facebook page, ang dayalogo nagsilbing plataporma alang sa mga stakeholder aron mahisgutan ang mga isyu may kalabotan sa pagsaka sa pasahe sa mga pasahero ug freight rates, ang epekto sa nag-usab-usab nga presyo sa krudo, ug mga lakang aron masiguro nga ang pagtaas sa pasahe magpabiling makatarunganon, transparent, ug nahiuyon sa kasamtangang kahimtang sa ekonomiya.
Dugang pa sa MARINA-7, magpadayon kini sa pakig alayon sa mga shipping operator ug sa pagmonitor sa mga kalamboan nga makaapekto sa domestic shipping industry aron mapadayon ang balanse tali sa operational sustainability ug sa interes sa mga pasahero ug tiggamit sa serbisyo sa kargamento. — /MEL (BANAT NEWS)
- Latest















