Flood control plan gisugyot sa USA ka grade 5 student

CEBU, Philippines —  Usa ka 10-anyos nga grade 5 student ang niadto sa buhatan ni Cebu City mayor Nestor Archival niadtong Hunyo 29 aron isugyot ang usa ka flood control  plan.

Si Annanda Fang, nag eskwela sa Cebu International School, nituki kabahin sa risgo sa baha, pamaagi sa paglikay, ug solusyon nga dunay partisipasyon sa katawhan aron mapalambo ang kaandam sa gobyerno sa moabot nga kalamidad sa Sugbo.

Gisugyot ni Annanda ang solusyon, lakip ang usa ka solar-powered nga flood-monitoring ug alarm system diin kini makamatikod og pagsaka sa tubig ug mapasidaan sa komunidad ang dali nga pagbakwit.

Usa sab sa gi presentar ni Annanda ang miniature village model diin kini inspired sa Villa del Rio Village aron ipakita ang posible nga senaryo sa baha kung unsaon paggamit ang warning system ug mga pamaagi sa pagdumala niini.

Kauban ni Annanda ang iyang maestra nga si Michelle Lacerna atol sa interview ngadto kang Mayor Archival, diin gipangutana niya og unsa ang katungdanan ug responsibilidad sa mayor kung dunay baha, unsa man ang pamaagi o programa para ma likayan ang baha, giunsa pag-ila ang mga lugar nga risgo sa baha, ug pamaagi aron mapahibalo ug giyahan ang katawhan sa baha.

Gipasabot sa Mayor ang responsibilad niya sa panahon sa pagbaha nga magpunting sa dali nga paghatag og tabang, mga operasyon sa pagluwas, ug pagsiguro sa kaluwasan sa naapektuhan nga residente.

Si mayor Archival nakadayeg sa maong inisyatiba ni Annanda ug iyang giila ang kamahinungdanon sa partisipasyon sa kabatan-onan sa pagtubag sa hagit nga may kalabutan sa kalamidad.