Lima ka mga sawa, gitugyan sa CENRO ngadto sa DENR
CEBU, Philippines — Gitugyan sa City Environment and Natural Resources Office (CENRO) ngadto sa Department of Environment and Natural Resources Region 7 (DENR-7) ang lima ka naluwas nga sawa o reticulated python niadtong Mayo 26, 2026.
Malampusong narekober sa CENRO ang lima ka sawa nga naghatag og kabalaka sa mga residente tungod sa ilang presensya sa ilang lugar.
Ang mga sawa na-rescue gikan sa nagkadaiyang barangay sama sa Pusok, Punta Engaño, Babag, Looc, ug Pajo pinaagi sa mga rescue operations ug mga report gikan sa mga residente. Ang mga sawa naa na karon sa kustodiya sa CENRO sulod sa pipila ka semana diin sila gimonitor ug temporaryong giatiman sa dili pa pormal nga i-turnover ngadto sa DENR-7.
Sumala ni DENR-7 Chief of Biodiversity Management Unit Luther V. Dejanida, ang mga gi-rescue nga mga sawa i-turnover nila sa Wildlife Rescue Center (WRC).
Ang mga wildlife specialists mao’y mopadayon sa pagsusi sa mga sawa ug mosusi sa ilang kondisyon ug mangita sa saktong lugar kung asa sila pwedeng buhian balik sa kalasangan.
Gipahinumdoman nila ang mga residente nga i-report sa CENRO ang mga wildlife sightings ug likayan ang pagpanakit ug pagdakop niini, tungod kay giila kini isip protected species ubos sa Philippine Wildlife Law.— Mia D. Esplaguera, CNU-Intern, IBM BANAT NEWS
- Latest
