Ordinansa alang sa ayuda sa senior citizen sa Cebu City amendahan

CEBU, Philippines — Mga senior citizen nga narehistro isip botante niadtong 2014 sa Dakbayan sa Sugbo mamahimo na unya nga makatagamtam sa tinuig nga P12,000 nga pinansiyal nga ayuda gikan sa siyudad kon maaprobahan ang bag-ong gisugyot nga pag-amendar sa City Ordinance No. 2453 nga gisang-at nila ni Konsehal Nyza “Nice” Archival, Konsehal Pastor “Jun” Alcover, Jr. ug Konsehal Harry Eran nga nagtumong sa pagpalapad sa sakop sa senior citizen financial assistance program pinaagi sa pag-usab sa voter registration cut off gikan sa 2013 ngadto sa 2014.

Ug kon maaprobahan human sa mga deliberasyon ug diskusyon sa konseho mas daghang senior citizen ang mahimong kwalipikado sa benepisyo.

Ubos sa kasamtangang ordinansa kinahanglan nga rehistradong botante sa siyudad ang usa ka senior citizen sukad pa sa 2013 o mas sayo aron mahimong kwalipikado sa P12,000 nga ayuda matag tuig.

Apan ubos sa gisugyot sa pag-usab sa ordinansa, ang cut off year ibalhin ngadto sa 2014 diin nagpasabot kini nga ang mga senior citizen nga nakarehistro isip botante niadtong 2014 apan wala makaangkon sa benepisyo kaniadto mahimo na’ng makaapil sa programa.

Ang mga nakarehistro sa maong tuig kinahanglan nga magpakita og voter’s certification gikan sa Commission on Elections.

Gawas sa voter’s vertification kinahanglan usab nga ang aplikante usa ka kwalipikadong senior citizen, residente sa siyudad ug makatuman sa tanang dokumentaryong rekisitos nga gipangayo sa siyudad.

Ang proposal sa tulo ka konsehal subay kini sa Local Government Code of 1991 nga nagtugot sa mga lokal nga gobiyerno sa pagpatuman og mga social welfare program alang sa mga senior citizen.

Nalatid usab sa maong proposal nga liboan ka senior citizen ang nakarehistro niadtong 2014 nga padayong nagpaabot nga makadawat og ayuda ug natanggong pa sa waiting list.

Sa pagkakaron, ang proposal anaa na sa mga Committee on Laws, Committee on Senior citizens, ug Committee of Budget and Finance alang sa dugang deliberasyon sa dili pa kini maaprobahan. BDB BANAT NEWS