Multicab misampak sa balay, managsuon patay

CEBU, Philippines — Patay ang duha ka managsuon samtang duha usab ang naangol human nabangga sa usa ka balay ang ilang gisakyang multicab sa Barangay Dakit, Barili, Cebu niadtong Domingo sa hapon, Mayo 24, 2026.

Ang mga namatay giila sa kapolisan nga sila si Arturo Herado Aranda, 64, residente sa Barangay Tubod, Barili nga maoy nagmaneho sa multicab, ug si Andres Herado Aranda, 56, nagpuyo sa lungsod sa Tuburan.

Ang duha ka pasahero nga naangol giila nga sila si Vergita Aranda, 60, ug si Roselyn Paglinawan Arcillas, 48, pulos naa pa sa tambalanan apan luwas na ang kahimtang.

Base sa imbestigasyon sa Barili Police Station, padulong na untang mouli sa Barangay Tubod ang mga biktima gikan sa Barangay Mayana sa dihang nahitabo ang aksidente.

Nasayran sa mga imbestigador nga pag-abot sa  dulhogong bahin sa dalan  nikagar ang brakes sa multicab hinungdan nga wala na makontrolar sa drayber ang sakyanan.

Misimang ang multicab ug nibangga sa balay nga gipanag-iya ni Grace Olmilla. Ang upat ka sakay sa sakyanan nakabaton og mga samad ug gidali dayong dad-on sa duol nga ospital aron matambalan.

Apan si Arturo ug Andres gideklarar nga patay na pag-abot sa ospital sa attending physician.

Nasayran sa kapolisan gikan sa anak sa namatay nga drayber daan nang naay deperensya ang multicab.

Mipasalig usab ang pamilya sa drayber nga ilang ipaayo ang balay nga nabanggaan.—  IBM BANAT NEWS