300 kg karneng manok gilabay

CEBU, Philippines — Mireklamo ang mga residente sa Purok 5, Sitio Bungan, Barangay Cambinocot sa bukirang bahin sa Dakbayan sa Sugbo tungod sa grabeng kabaho nga nihabol sa ilang palibot.

Diha nalang nila nadiskubrehan nga gilabayan sila didto og gibana-bana nga 200 hangtud sa 300 ka kilo nga karneng manok nga nagsugod na og kadugta.

Sa pagpakighinabi sa Banat News ngadto kang Konsehal Adones Atuel, gitug-an niini nga unang higayon kini nga nahitabo sa barangay.

Matud pa niya, nireklamo ang ilang mga residente tungod sa nangalisbong   mga karne sa manok nga nadiskubrehan niadtong Mayo 23, 2026. Sa imbestigasyon sa barangay, nakuha sa CCTV duol sa barangay hall nga adunay miaging closed van o meat van niadtong 11:05 sa gabii sa Mayo 22.

Mao kini ang gituohang nagyabo sa daplin sa karsada sa nanimaho nang karneng manok. Ang problema karon sa barangay dili maklaro sa CCTV ang plate number niini tungod sa kangitngit sa lugar.

“Nangita pa gyud mi og expert nga maklaro to siya ug ma-trace kay luoy kaayo among barangay nga nindot kaayo diri kay presko kaayo ang hangin unya ing-anaon lang nila, labayan lang mi og mga baho,” suma pa ni Atuel. 

Dugang pangagpas pa sa mga residente nga basin og nisuhol ang tag-iya nga ipalubong ang mga karne pero wala buhata sa mga gisuholan ug gilabay lang hinuon sa daplin.

Gipaabot na sa Barangay Environmental Officer (BEO) ang maong insidente ngadto sa Cebu City Environment and Natural Resources Office (CCENRO) aron nga mapaubos og imbestigasyon.

Aron pagwagtang sa baho, gidauban ni og mga lukay hangtud naugdaw. — IBM BANAT NEWS