30 ka transport cooperative interesado sa EV modernization

CEBU, Philippines — Nipakita og kaikag ang kapin 30 ka transport cooperatives sa nagkadaiyang bahin sa Sugbo kalabot sa programa sa gobiyerno alang sa electric bus modernization nga nagtanyag og ubos nga interest ug walay kinahanglan nga down payment alang sa mga kwalipikadong aplikante.

Ang maong programa gipangulohan sa Department of Transportation (DOTr) ug Department of Trade and Industry (DTI) aron dasigon ang transp0ort cooperatives nga mobalhin ngadto sa paggamit og electric buses pinaagi sa loan-based financing model.

Matud ni Provincial Planning and Development Officer Elizar Sabinay, Jr. nga giila ang Sugbo isip usa sa prayoridad nga lugar alang sa nationwide rollout sa electric vehicles gawas sa Metro Manila.

Gipasabot ni Sabinay nga nakigpulong si Governor Pamela Baricuatro ngadto sa opisyales sa Small Business Corporation (SBCorp) didto sa Manila aron hisgotan ang paghatag og prayoridad sa Sugbo alang sa deployment sa electric buses alang sa pampublikong transportasyon.

Ang papel sa Probinsiya sa Sugbo mao ang pag-organisa ug pagtigom sa mga interesadong transport cooperatives alang sa orientation ug onboarding kabahin sa loan applications ilawom ubos sa programa.

Matud usab ni Sabinay nga 30 ka cooperatives ang nakakompleto ug nakapasar na sa ilang mga rekisitos nga gisumite kagahapon alang sa online processing ug evaluation sa SBCorp.

Ang financing facility gisuportahan sa P2 bilyones nga pundo pinaagi sa SBCorp ubos sa DTI aron masuportahan ang electric vehicle transition program sa gobiyerno nga kabahin usab sa paningkamot sa pagsulbad sa pagsaka sa presyo sa gasolina ug uban pa’ng isyu sa enerhiya.

Ang matag kwalipikadong cooperative mahimong maka-avail hangtud sa tulo ka electric buses.

Ang unit mokantidad og kapin sa P4.5 milyones apan mga P1.5 milyones lang ang mahimong mabayaran pinaagi sa financing tungod kay ang manufacturers maoy mo-subsidize sa katunga sa kantidad.

Gipasabot ni Sabinay nga dili sama sa ubang modernization programs diin kinahanglan pa mangutang sa Land Bank of the Philippines o Development Bank of the Philippines ug maghatag og initial cash-out apan sa EV program wala na’y kinahanglan nga down payment kon maaprobahan ang loan.

Ug online ang proseso sa aplikasyon ug ang approval mahimong moabot ngadto sa pito ka adlaw hangtud sa duha ka semana depende sa evaluation sa SBCorp.

Lakip sa rekisitos ang SEC registration papers, business permits, annual audit reports ug bank account details.

Sa higayon nga maaprobahan, posibleng madawat sa cooperatives ang ilang electric buses sulod sa 120 ka adlaw lakip na ang manufacturing ug delivery ngadto sa Sugbo.

Gikataho nga adunay 60 ka accredited transport cooperatives sa Sugbo nga narehistro sa Land Transportation Franchising and Regulatory Board (LTFRB) ug sila maoy prayoridad sa programa isip kabahin sa Public Utility Vehicle Modernization Program.

Kadaghanan sa mga aplikante karon gikan sa Metro Cebu apan adunay interesado gikan sa transport groups sa Lungsod sa Sibonga ug Dakbayan sa Danao. (BANAT NEWS)