Kidnapping?

CEBU, Philippines — Naghimo karon og lawom nga imbestigasyon ang kapulisan bahin sa nag viral nga video sa social media nga giingong kidnapping diha sa usa ka parkingan sa Barangay Banilad, Cebu City.

ang gitahong pagdukot sa Cebu City human ilang madiskubre nga posibleng nalambigit ang insidente sa usa ka P1.8 milyones nga transaksyon sa duha ka sakyanan.

Ang maong hitabo na-blotter sa Mabolo Police Station 4. Ang video nga dunay titulong “Kidnapping Alert in Cebu” nahitabo niadto pang Mayo 11, 2026.

Duha ka semana nang nakalabay ayha pa gi-post. Apan nasayran sa kapolisan nga ang duha ka mga lalaking nakuha sa video nga gipangkulata ug pugsanong gikarga  sa usa ka puting van, luwas ra man ug nakauli na sa ilang mga pamilya.

Matud ni Police Major Eric Gingoyon, hepe sa Mabolo Police Station 4, duna na silay person of interest sa maong hitabo nga nakuha sa CCTV camera.

Base sa inisyal nga imbestigasyon, ang biktima middleman sa vehicle financing u gang POI gialegar nga nagprenda kaniya og duha ka sakyanan nga usa ka Nissan Sentra ug Toyota Innova nga nagkantidad og P1.8 million ang duha.

Gusto untang lukaton sa POI ang mga sakyanan apan wala kini ikabayad apil ang P150,000 nga interest. Matud pa nga gusto sa POI nga kuhaon ang maong mga sakyanan kay iyahang iprenda sa lain aron mabayran niya ang biktima.

Gikatahong nagsabot ang duha nga magkita sa usa ka mall sa Dakbayan sa Mandaue niadtong Mayo 10 aron hisgutan ang turnover sa mga sakyanan ug mobayad sa ang POI sa iyang obligasyon.

Apan ang POI nipahibalo nga dili kini madayon kay naay gipamati sa lawas ang asawa sa POI. Apan nagkasabot gihapon nga magkita nalang sila duol sa usa ka subdivision sa Banilad, Cebu City.

Samtang gapaabot sila didto sa parkingan, miabot ang usa ka puti nga sakyanan ug usa ka gray nga sakyanan ug didto gikulata ang biktima ug iyang kauban ug pugsanong gipasakay matud pa sa maong sakyanan.

Pag Mayo 11 sayo sa buntag, nakit-an didto sa usa ka hilit nga dapit sa Dakbayan sa Naga ang biktima ug gitabangan sa mga pulis.  Ang biktima nangangkon nga gikuha sa maong mga lalaki ang iyang personal nga mga butang lakip ang iyang cellphone ug relo. Nahibulong siya nganong siya ray gibuhian ug wala 'tong usa niya ka kauban.

Ang kapolisan sa Naga ni-coordinate sa Mabolo Police Station anang adlawa bahin sa nahitabo.

Apan bisan pa man sa maong viral video sa social media, wala gikompirmar sa kapolisan nga kidnapping ang nahitabo.

Gisuta usab sa mga otoridad ang mga report nga posibleng walay legal nga mga papeles ang maong sakyanan ug kun duna bay modus nga nagpaluyo sa maong mga transaksyon.

Gipasabot usab sa mga awtoridad nga isolated case lang kadto ug wala nagpasabot nga dunay kidnapping trends sa Cebu City.

“Kasagaran malinawon ang Cebu City. Isolated case ra ni,” matud ni Gingoyon. (BANAT NEWS)