Pagpalapad sa CBRT sa South Road Properties gipahunong

CEBU, Philippines — Kasamtangang gibabagan una sa Committee on Laws ang gisugyot nga pagpalapad sa Cebu Bus Rapid Transit (CBRT) system sulod sa South Road Properties (SRP) joint venture area human nasuta wala pa masumitir ang pipila ka importanteng dokumento.

Sa committee report nga gipangulohan ni Konsehal Mikel Rama, giingon nga dili pa makahimo ang komite og kumpleto nga ebalwasyon ug mga rekomendasyon tungod sa kuwang nga mga dokumento, ilabi na ang Joint Venture Agreement tali sa kagamhanan sa Dakbayan sa Sugbo ug Filinvest Land Incorporated.

Ang Department of Transportation (DOTr) nangayo og pagtugot alang sa pagtukod sa 2.70-kilometro nga CBRT thoroughfare nga molibot sa SRP joint venture property.

Lakip sa plano ang usa ka exclusive BRT lane nga adunay upat ka estasyon, mixed-traffic lanes, bicycle lanes, planting strips, drainage improvements ug street lighting facilities kun diin magamit ang 10,223 square meters nga luna, diin 8,726 square meters niini anaa sulod sa joint venture property sa Filinvest ug 1,479 square meters ang yutang gipanag-iya sa kagamhanan.

Apan si Rama nagkanayon nga ang kakuwang sa JVA nakababag sa konseho sa pagtino sa importanteng legal ug pinansyal nga mga isyu sama sa limitasyon sa kontrata, pagdeterminar sa mga istruktura sa pagpanag-iya, katungod, obligasyon, ug kun mahimo bang legal nga tugotan sa siyudad ang gisugyot nga mga road works sulod sa joint venture property nga walay klarong pagtugot sa Filinvest.

Ang ingon sab sa komite nga posibileng dunay paglapas sa constitutional prohibition batok sa impairment of contracts kun aprobahan sa dakbayan ang proyekto nga wala pa hingpit nga masusi ang mga kondisyon sa JVA.

Tungod niini, girekomenda sa komite nga ibalik una ang hangyo ngadto sa DOTr alang sa subli nga pagpa-ubos og ebalwasyon ug pagsumite og dugang nga supporting documents aron nga matuki kini og pagbalik sa konseho.