Bokya nidagsa

CEBU, Philippines — Tungod sa pagdagsa sa mga bokya sa kabaybayonan sa lungsod sa Argao diin duna nay mga batang nangaangol tungod niini, nagpahimangno ang Municipal Disaster Risk Reduction and Management Office sa Argao sa mga mangaligo og dagat, residente, og mga beachgoers  nga magbantay.

Kaning maong mga bokya una nang nasigpatan niadto pang nakalabay nga semana, apan mas nigrabe ni pagkasunod nga mga adlaw. Gani niadtong Mayo 19, 2026 nidagsa ang daghang mga bokya diha sa Lawis Beach, Argao, niadtong Mayo 19, 2026.

Ang maong advisory issue gipagawas sa MDRRMO Argao human nadawat ang mga report ug mga hulagway nga nikatap ang gagmay nga mga jellyfish duol sa baybayon  sa Lawis Beach ug Argao Pier.

Duna say mga hulagway sa mga batang naputos og mga katol-katol tibuok kalawasan tungod sa bokya.

Gani duna pay video sa social sa usa ka panimalay nga nisulod ang tubig dagat atol sa pagtaub diha sa ilang balay ug ang tubig  pwerteng daghang mga bokya.

Giawhag ang  mga residente nga magmatngon sa  gagmay, nagsiga nga itom ug brown nga mga bokya sa  dagat nga usahay lisod makit-an.

Kasagaran kining makita sa daplin sa dagat, ilabi na human sa  high tide, kusog nga hangin, o kung init ang tubig.

Dugang pa nila, kinahanglang tan-awon una sa mga mangaligo ang tubig ayha mosawom, kinahanglang magsul-ob og rash guard o wet suit, ug likayan ang mga jellyfish bisan patay na kini o naanod sa baybayon tungod  kay mahimo gihapon nga  makapakatol sa panit.

Suma pa ni Johann Friedrich Tejad, usa ka  Marine Biologist ug Environmental Safeguard sa Bureau of Fisheries and Aquatic Resources (BFAR) ang maong matang sa jellyfish gitawag og thimble jellyfish.

Kini dili makamatay apan katol ni sa panit.  Dugang pa niya, normal ra kini nga panghitabo kun ting-init, ug dili angayng kabalak-an, kinahanglan lang gihapon nga magbantay.

Likayan usab ang ubang klase sa jellyfish tungod kay ang uban  niini peligroso kaayo kay makapatay.

Samtang, usa ka residente nga si Kevin Van Verzosa ang nag-post og video diin makita ang mga jellyfish sa Sitio Lawis, Brgy. Poblacion, Argao, Cebu.

Matud niya, ang maong panghitabo dili na bag-o kay matag tuig nila kini masinati basta padulong na ang habagat.

Giawhag usab sa  MDDRMO Argao ang mga residente ug mga byahero nga magpabilin nga alerto ug ireport dayon  kung adunay makit-an aron malikayan kini sa  mga turista ug uban pang mangaligo sa dagat. – Cheny R. Labrador, CNU-Main Journalism Intern/IBM BANAT NEWS