Anti-Mendicancy Ordinance subling patun-an

CEBU, Philippines — Patun-an pag-usab ni Konsehal Pastor “Jun” Alcover ang Anti-Mendicancy Ordinance human sa kontrobersyal nga pagdakop sa 68-anyos nga harmonica player nga si Ireneo Vidal.

Sa nasayran ang maong insidente nakapukaw og kasuko sa publiko tungod matud pa dili makatawhanon ang pagpatuman sa balaod.

Si Vidal gidakop sa Cebu City Anti-Mendicancy Office (CCAMO) niadtong Mayo 7, 2026 human matud pa nga nagpatukar og harmonica sa dalan Colon aron dunay ikapalit og pagkaon alang sa iyang tres anyos nga apo.

Gumikan niini nabanhaw ang diskusyon kung milapas ba si Vidal sa balaod batok sa pagpakilimos, ilabina nga adunay laing ordinansa ang siyudad nga nagtugot ug nanalipod sa mga lehitimong mopasundayag sa kadalanan.

Sa iyang privilege speech gipadayag ni Alcover ang iyang kabalaka sa pagpatuman sa ordinansa ug nanawagan og hiniusang imbestigasyon sa pagdakop kang Vidal.

Matod ni Alcover, ang Section 5 sa City Ordinance No. 1631 nagmando nga ang mga tigulang, masakiton, ug adunay pisikal o mental nga kakulian nga mendicants kinahanglan itugyan sa Department of Social Welfare Services (DSWS) ug dili angayan nga prisohon.

Nakapangutana sab ang konsehal kung nganong gibalhog sa prisuhan si Vidal ug wala tabangi sa mga social workers.

Gitug-an usab ni Alcover nga gidagmalan ang maong tiguwang atol sa pagdakop.

“Mga kaigsoonan, ang pagkatigulang dili sala. Ang kapobrehon dili krimen. If these allegations are proven true, then accountability must follow. Because no elderly person deserves abuse. No grandfather deserves humiliation,” matod pa niya.

Gibutyag usab ni Alcover nga ang Cebu City Anti-Mendicancy Board nga giumol ubos sa City Ordinance No. 1840 apan wala pa'y pormal nga tigom sukad kini naporma.

Samtang, si Konsehal Philip Zafra misuporta nga subling tun-an ang maong ordinansa ug miingon nga kinahanglan mailhan ang kalainan sa pagpakilimos ug ang pag-busking.

“Kung nag-busking ka, nag-perform ka ug naglingaw sa katawhan, boluntaryo ra ang paghatag sa donasyon,” matod ni Zafra.

Sa habig sab ni Konsehal Jose Lorenzo Abellanosa kinsa maoy nangamahan sa busking ordinance nga kinahanglan unta mapanalipdan si Vidal sa maong ordinansa.

Sa pagkakaron, ang konseho andam sab sa pagtuon sa ordinansa kung aduna ba’y kalapasan si Vidal ug kinahanglan sab kini nga klaruhon kung unsa ang mga pamaagi aron nga dili masubli ang nasinati ni Vidal nga gidakop samtang nanginabuhi pinaagi sa pagpatukar og harmonica. (BANAT NEWS)