Yellow alert gihapon ang Visayas grid

CEBU, Philippines — Ang Visayas power grid gipaubos sa extended Yellow Alert alang sa Martes, Mayo 20, 2026, nga gipatuman gikan alas 4:00 sa hapon hangtod alas 9:00 sa gabii, tungod sa huyang nga operating reserves ug limitado nga available nga kapasidad sa mga power plants.

Base sa datos sa grid monitoring nga giisyu alas 2:00 sa hapon kagahapong adlawa, ang available capacity kay 2,674 megawatts (MW), samtang ang peak demand miabot og 2,473 MW, nga nagbilin og gamay nga reserba sa suplay sa kuryente alang sa hapon ug gabii.

Gipahibalo sa National Grid Corporation of the Philippines (NGCP) nga daghang generating units ang wala mag-operate: siyam ka planta naa sa forced outage sukad Mayo 2026, usa sukad Marso 2026, tulo sukad 2025, duha sukad 2024, duha sukad 2023, ug usa sukad sa tuig 2021.

Dugang pa niini, 15 ka planta nagdagan sa derated capacity, nga nagpasabot nga mokabat sa 847 MW ang dili magamit sa grid.

Lakip sa mga hinungdan sa pagpadayon sa Yellow Alert mao ang wala gihapon pag-operate sa dagkong coal-fired power plants sa Visayas, sama sa TVI Unit 1, TVI Unit 2, ug PEDC Unit 3, ug ang pagtaas sa forecasted system demand nga mokabat sa 95 MW.

Ang Yellow Alert ipagawas kun ang operating margin dili igo aron matubag ang contingency requirement sa transmission grid, nga nagpasabot nga posibleng kulang ang reserba kung naay kalit nga pagkawala sa power plant o pagtaas sa demand. (BANAT NEWS)