Tindahan sa electronic devices gironda sa kapolisan
CEBU, Philippines — Duha ka sales clerks nga babaye ang nasikop atol sa entrapment operation sa Criminal Investigation and Detection Group Regional Field Unit (CIDG RFU)- 7 kauban ang National Telecommunications Commission (NTC)- 7 ug partner units kagahapon sa hapon.
Gikataho nga ang mga suspetsado sales clerks kini sa electronic devices diin ang ilang tindahan nga gitrabahoan nahimutang diha sa Luym Building, Plaridel Street, Barangay Santo Niño. Ang Oplan Mega Shopper gipahigayon subay sa mga taho nga adunay giingong namaligya og uncertified electronic products.
Giila ang mga suspetsado nga si alyas “Del,” 35, ug “Frex,” 32 parehong residente sa Dakbayan sa Sugbo.
Atol sa operasyon ang mga polis nagpaila nga kunohay mga buyer.
Atol sa transaksiyon ang mga suspetsado namaligya kini og mga non-compliant products ngadto sa poseur-buyer.
Ang kapolisan nipahigayon og on-site inspeksiyon ug inventory sa tindahan diin na- recover ang pipila ka electronic products gikan sa posisyon sa mga suspetsado.
Gikonpirma sa representante sa NTC nga ang na-recover nga items giingong walay NTC certifications, permits, ug conformity markings subay sa balaod. Si Kapitan Lourdes Ramirez sa Barangay Santo Niño nagkanayon nga ang mga suspetsado wala makapakita og business permit ug barangay permit nga kinahanglanon aron maka-operate og negosyo.
Apil sa mga nasakmit atol sa operasyon ang pipila ka HP Elitebook laptops, Lenovo laptops, Dell laptops, ug uban pa’ng electronic items nga gibana-banang nibalor tanan ngadto sa P5.3 milyones. — Cheny R. Labrador (BANAT NEWS)
- Latest
