Binaliw landfill gilantaw nga subling gamiton

CEBU, Philippines — Gipahibalo ni Cebu City Mayor Nestor Archival, Sr. nga posible nga subli nga gamiton sa siyudad ang landfill sa Barangay Binaliw kong masiguro na sa pasilidad nga nakatuman na kini sa tanang safety requirements ug environmental standards.

Si Archival nagkanayon nga kinahanglan nga masumite ug motuman sa Prime Integrated Waste Solutions, Inc. (PIWSI) sa mga kondisyon ug requirements nga gipangayo sa Department of Environment and Natural Resources (DENR) aron nga makapadayon kini sa operasyon ug makadawat na og binulto nga basura gikan sa siyudad.Sa pagkakaron, nagsugod na og inspeksiyon ang bag-ong gitukod nga Waste Crisis Task Force aron susihon kong luwas ba nga makadawat pag-usab og basura ang partially reopened nga landfill sa Binaliw.

Ang operasyon sa landfill nagdawat kini og mga basura gikan sa mga pribadong kompaniya ug gibutang kini pinaagi sa interim cells nga giaprobahan sa DENR samtang nagpadayon ang rehabilitasyon sa habig sa landfill diin nahitabo ang pagdahili sa mga basura niadtong Enero 8, 2026.

Matud sa DENR-7 nga ang partial reopening magpabiling ubos sa higpit nga pagsunod sa Environmental Compliance Certificate ug uban pa nga rehabilitation requirements.

Gibutyag usab ni Archival nga ang orihinal unta nga plano sa siyudad nga mopadayon sa hauling operations sa Mayo 17, 2026 ngadto sa Binaliw apan wala kini gipadayon human sa mga kabalaka nga gipadayag sa pipila ka sektor.

Karon, limitado pa kaayo ang kapilian sa siyudad alang sa paglabay sa basura tungod sa padayon nga rehabilitasyon ug imbestigasyon sa Binaliw ug sa pagkapupos sa kontrata sa paglabay sa Aloguinsan.

Ug kong mapamatud-an nga dili gihapon luwas ang Binaliw mangita si Archival nga mangita og laing kalabayan.

Usa sa gikonsidera nga alternatibo mao ang pagdala pag-usab sa basura ngadto balik sa Aloguinsan.

Apan matud ni Archival nga dako kaayo nga mahimong gastohan sa kagamhanan  diin mahimong moabot sa P4.2 milyones matag adlaw ang gasto sa transportasyon ug hauling sa basura ngadto sa Aloguinsan.

Kasamtangang gitigom ang mga gikolekta nga basura sa South Road Properties.

Si Archival nagkanayon nga napugos kini nga magbutang sa SRP gumikan kay walay laing kabutangan ang siyudad bisan pa og gisalikway sa Environmental Management Bureau-7 niadtong Enero niining tuiga ang hangyo sa siyudad nga temporaryong magbubo og basura duol sa pond A sa SRP.

Ang EMB-7 nagkanayon nga daghang epekto sa kalikupan kong ibutang ang mga basura sa pond A ilabi na nga duol kini sa sapa ug dagat nga dako og posibilidad nga mosangpot kini sa kontamisyon sa tubig. BDB BANAT NEWS