Kaso batok sa “CERNET 27” gibasura

CEBU, Philippines — Gibasura sa usa ka Regional Trial Court sa Cebu City ang kaso sa pagpundo sa terorismo batok sa gitawag nga “CERNET 27,” nga gihulagway sa mga respondent isip dakong kadaugan alang sa mga human rights defenders, development workers, ug civil society organizations nga giakusahan ubos sa anti-terrorism laws.

Sa desisyon nga gipetsahan niadtong Mayo 15, 2026 ug gipagawas niadtong Mayo 18, gihatagan ni RTC Branch 74 Pairing Judge Van Russel Inopiquez og pabor ang joint motion to dismiss nga gisumite sa mga abogado sa Cebu Community Network Inc. (CERNET) niadtong Marso 31, 2026.

Sumala sa CERNET sa ilang press statement, gibasura ang kaso nga gisang-at ubos sa Terrorism Financing Prevention and Suppression Act of 2012 o Anti-Terror Financing Law human giingon sa korte nga ang mga alegasyon wala maglangkob og krimen ubos sa balaod nga epektibo sa panahon nga kini nahitabo ug tungod usab sa kakulang sa statutory publication requirement.

Ang reklamo naggikan sa alegasyon nga ang 27 ka direktor ug staff members sa CERNET naghatag og pundo sa New People’s Army (NPA).

Miingon ang mga respondent nga ang pagbasura sa kaso nagpakita sa peligro sa paggamit sa mga counterterrorism laws batok sa humanitarian ug development work, ug ilang giingong gihimong armas sa pipila ka sektor sulod sa security apparatus sa gobyerno, ilabina sa National Task Force to End Local Communist Armed Conflict o NTF-ELCAC.

Ang orihinal nga reklamo gisang-at niadtong Mayo 23, 2023 ni kanhi Philippine Army Colonel Joey A. Escanillas, nga kaniadto commander sa Joint Task Force Cebu. Paglabay sa usa ka tuig, si Senior Deputy State Prosecutor Peter Ong, nga nangulo sa NTF-ELCAC legal task force, maoy misang-at sa information ngadto sa RTC Branch 74 sa Cebu City.

Sumala sa mga respondent, ang listahan sa mga giakusahan naglakip og tulo ka mga indibidwal nga dugay nang namatay sa wala pa masang-at ang kaso.

Bisan pa sa pagbasura sa kaso, pabiling nabalaka ang mga respondent sa mga pending legislative measures sama sa gisugyot nga “terror-grooming” bill nga gisang-at ni senador Ronald dela Rosa, ug nagpasidaan nga posibleng mapalapad pa niini ang gahum sa gobyerno sa pagtarget sa dissent, activism, ug community organizing ubos sa mga polisiya kontra-terorismo.

Gipahibalo usab sa mga akusado nga ilang padayonon ang pagsang-at og criminal, administrative, ug civil cases batok sa mga indibidwal ug ahensya nga ilang giingong responsable sa giila nilang sayop nga pagprosecute. MEL BANAT NEWS