Unity Cup himoon sa siyudad sa Mandaue

CEBU, Philippines — Gihiusa sa unang higayon ang Mandaue Mayor’s Cup ug ang Ouano–Dizon Congressional Cup nga nahimong usa ka dakong kalihukan sa paugnat sa kusog nga pagahimoon karong Mayo 24 diha sa Mandaue City Cultural and Sports Complex.

Matod pa ni City Administrator Atty. Sally Malig-on, ang Unity Cup karong tuiga puno sa mga pahalipay, uban sa mas dako nga torneyo, mas dagkong premyo, ug espesyal nga celebrity-player guest nga moapil sa grand launching aron makadugang og kasadya sa mga Mandauehanon.

Apan usa sa mga bag-ong bahin sa Unity Cup mao ang pag-apil sa mga partisipante nga nag-edad og 40 anyos pataas.

Malaumon si Malig-on nga ang maong kalihukan maghatag ug inspirasyon sa katawhan nga mahimong aktibo sa sports.

Usa usab sa hinungdan niini mao ang maayong resulta sa miaging Congressional Cup, nga nakapadasig ug nakapaingganyo nga madala usab ang maong “vibe” ngadto sa Mayor’s Cup.

Ang kalihukan sugdan pinaagi sa parade ug ang tournament aduna sab kini exhibition game sa mga midaug sa volleyball ug basketball sa bag ohay ra nga CESAFI.

Ang mga duwa ipahigayon sa nagkalain-laing lugar gumikan sa padayon pa nga pag-ayo ug pagpanindot sa complex. Apan, gilauman sa mga administrador nga mahuman na ang tanang mga kausaban sa venue sa dili pa mahuman ang torneyo. — Mia D. Esplaguera CNU intern/MEL  BANAT NEWS