DOE mipalapad sa fuel subsidy program sa gobyerno

CEBU, Philippines — Gipalapdan ang fuel subsidy program sa gobyerno alang sa mga public utility vehicle (PUV) diin kapin sa P13.4 million na nga fuel subsidies ang nagamit sa 12,688 ka PUVs sa tibuok nasod hangtod sa Mayo 14, sumala sa Department of Energy.

Si Rino E. Abad, director sa Oil Industry Management Bureau (OIMB) sa DOE miingon nga ang programa nga naghatag og P10-per-liter nga fuel subsidy gipatuman sa hiniusang paagi sa Land Transportation Franchising and Regulatory Board (LTFRB) ug sa Land Bank of the Philippines.

Iyang gipadayag nga ang pinakaulahing alignment meeting bahin sa programa gihimo niadtong Huwebes sa miaging semana, diin gipresentar ang mga update sa rollout sa subsidy ug ang mga gasolinahan nga apil sa programa.

Ang fuel subsidy initiative adunay inisyal nga budget nga P200 million ug gilauman nga magpadayon samtang ang gobyerno nagtinguha nga maabot ang target nga 141,000 ka PUV beneficiaries sa tibuok nasod.

Isip kabahin sa implementasyon, gi-report ni Reno nga 4,299 ka gasolinahan sa tibuok nasod ang nabutangan na og station codes, nga nagpasabot nga mahimo na silang moapil sa subsidy program. Niini nga ihap, mga 938 ka gasolinahan na ang aktibong nagpatuman sa programa.

Iyang gipatin-aw nga ang ihap sa mga apil nga gasolinahan nagpadayon sa pagtaas, gikan sa 600 lamang niadtong miaging semana ngadto sa 938 karon, samtang adunay kapin 4,000 ka gasolinahan pa nga gi-endorso na sa Landbank alang sa pag-isyu sa station codes.

Giawhag usab sa DOE ang mga gasolinahan sa tibuok nasod nga moapil sa fuel subsidy program gawas kung sila adunay teknikal nga problema o uban pang makatarunganong rason nga makapugong sa ilang pag-apil.

Suma pa ang maong direktiba nagtumong nga maapil sa umaabot ang kapin 8,000 ka gasolinahan sa tibuok nasod aron masiguro ang mas lapad nga access alang sa mga PUV drivers ug operators.

Sa laing bahin, ang Department of Social Welfare and Development-7 naghatag og Cash Relief Assistance (CRA) sa total nga 4,424 ka public utility jeepney (PUJ) drivers sa Central Visayas sulod sa duha ka adlaw nga payout activity niadtong Mayo 13–14, 2026.

Ang payout gihimo sa DSWD-7 personnel uban sa koordinasyon sa Land Transportation Franchising and Regulatory Board (LTFRB) – Central Visayas, nga naghatag sa validated list sa mga kwalipikadong benepisyaryo aron masiguro ang hapsay ug episyente nga pag-apod-apod sa tabang.

Ang inisyatiba uyon sa direktiba ni Presidente Ferdinand Marcos Jr. nga maghatag og dali nga suporta sa mga sektor nga naapektuhan sa pagsaka sa presyo sa gasolina ug nagpadayon nga mga ekonomikanhong hagit, ilabi na sa mga public utility vehicle (PUV) drivers nga nagpadayon sa paghatag og mahinungdanong serbisyo sa transportasyon sa publiko. (BANAT NEWS)