Visayas grid nagpabiling ubos sa yellow alert

CEBU, Philippines — Nagpabilin nga ubos sa yellow alert ang Visayas grid kagahapon human gilugwayan sa National Grid Corporation of the Philippines (NGCP) ang alert status tungod sa dakong pagsaka sa gilaomang panginahanglan sa kuryente.

Base sa advisory nga gipagawas alas 2:30 sa hapon kahapong adlawa, matud sa NGCP nga magpadayon ang yellow alert gikan alas 3:00 sa hapon hangtud sa alas 9:00 sa gabii.

Ang Visayas grid adunay available capacity nga 2,683 megawatts (MW) batok sa peak demand nga 2,585 MW nga nagpasabot nga nipis na lang ang operating margin sa sestema sa kuryente.

Matud sa NGCP nga ang pag-extend sa yellow alert tungod kini sa pagsaka sa forecasted system demand nga niabot og 137 MW.

Ang yellow alert gipahibalo kong ang operating margin dili na igo aron matubag ang contingency requirement sa transmission grid nga nagpasabot nga higpit na ang suplay sa kuryente ug posible nga maapektohan ang sestema kong adunay kalit nga outage o mosaka pag-ayo ang demand sa kuryente.

Gi-report usab sa grid operator nga daghang planta sa kuryente ang wala pa maka-operate o nagdagan ubos sa normal nga kapasidad nga dugang nakapahigpit sa suplay sa kuryente sa Visayas.

Base sa datos, 12 ka power plant ang naka-forced outage sukad sa Mayo 2026 samtang usa ka planta ang offline sukad Marso 2026.

Tulo ka planta ang wala pa makabalik sa operasyon sukad 2025, duha sukad 2024, duha sukad 2023, ug usa sukad 2021.

Gikataho nga 12 ka power plant karon ang nag-operate ubos sa ilang normal nga kapasidad o derated capacities. Sa kinatibuk-an, ang mga outage ug pagkunhod sa kapasidad sa mga planta miresulta sa pagkawala sa 845.2 MW nga suplay sa Visayas grid.

Wala pa magpahibalo ang NGCP kong kanos-a ilibkas ang yellow alert samtang padayon pa nilang gi-monitor ang kahimtang sa sestema. (BANAT NEWS)