Polis naangol, suspek naangol sab
CEBU, Philippines — Nasamdan ang usa ka polis ug ang usa ka suspetsado human sa engkwentro tali sa mga pulis ug duha ka lalaki samtang gipatuman ang warrant of arrest sa kaso sa qualified theft diha sa Barangay Biasong, Balamban niadtong Domingo sa buntag, Mayo 17.
Sumala sa Balamban Municipal Police Station, miadto ang mga operatiba sa balay sa subject sa warrant nga giila lang sa alyas “Jey-An,” 27 anyos, walay trabaho, ug residente sa maong lugar aron iserbisyo ang warrant nga giisyu niadtong Mayo 6, 2026 nga adunay rekomendadong piyansa nga P40,000.
Apan sa pag-abot sa mga pulis ug nagpaila sa ilang kaugalingon ug mipahibalo bahin sa ilang tuyo ngadto sa suspek.
Ang mga igsuon sa suspek, nga giila nga sila si alyas “Richard” ug alyas “Fred” kalit nga namusil sa sa mga operatiba.
Tungod ani, nibawos ang mga pulis ug naigo si alyas “Fred.” Usa sab ka polis ang nasamdan ug pareho silang gidala sa Cebu Provincial Hospital sa Balamban.
Naaresto hinuon ang subject sa warrant nga si alyas “Jey-An” ug ang napusilan nga si alyas “Fred” apan kadtong lain nilang igsuon nga giingong apil sa namusil sa mga polis nga si alyas “Richard” nakaikyas human sa insidente.
Nakuha sa crime scene ang usa ka .45 caliber pistol nga adunay tulo ka live rounds ug 10 gramos nga gituohang shabu nga adunay kantidad nga mokabat sa P68,000. Padayon pa ang imbestigasyon sa kapolisan sa maong insidente. (BANAT NEWS)
- Latest
