Tighimo og paltik Danao, nadakpan

CEBU, Philippines — Usa ka 38-anyos nga lalaki nga gipasanginlang ilegal nga tighimo og armas sa Syudad sa Danao  ang nadakpan human makumpiskahan og daghang armas, bala, ug kagamitan sa paghimo og pusil atol sa implementasyon sa search warrant sa Sitio Gondayan, Barangay Masaba.

Ang operasyon gipangulohan sa Provincial Intelligence Unit sa Cebu Police Provincial Office uban sa Danao City Police Station. Gisugdan ang pagronda  alas 11:35 sa gabii niadtong Mayo 16 ug nahuman alas 5:00 sa kaadlawon sa Mayo 17, 2026. Ang nadakpan giila nga si alyas "Mar" residente sa Sitio Gondayan, Barangay Masaba, Danao City.

Gipatuman sa mga operatiba ang search warrant nga giluwatan niadtong Mayo 14, 2026 ni Ma. Josefa Pinza-Ramos, Executive Judge sa RTC Branch 90 sa Danao City, tungod sa giingong paglapas sa Republic Act 10591 o Comprehensive Firearms and Ammunition Regulation Act.

Nasakmit sa operasyon ang tulo ka shotgun, usa ka kalibre .45 nga pistola nga walay serial number, daghang live ammunition, assorted magazines, firearm parts, ug nagkadaiyang kagamitan nga gituohang gigamit sa illegal nga paghimo og armas.

 Lakip sa narekober mao ang welding machines, grinders, drills, metal firearm patterns, steel plates, vice grip, welding rods, ug uban pang metal materials.

Base sa imbestigasyon sa kapulisan, gihimmong panginabuhian sa suspetsado ang paghimo og armas ug dugay na kining nalambigit sa gun-making activities. Nailhan usab siya sa maong lugar isip usa ka gunsmith.

Sumala sa kapulisan ang mga klase ug gidaghanon sa kagamitan nagpakita nga posible kining dugay nang operasyon paghimo og mga paltik.

Matud sa mga otoridad, ang pagkadakop sa suspetsado makapahinay sa sirkulasyon sa loose firearms ug makapakunhod sa posibleng insidente sa pagpamusil sa maong lugar.  Gipasabot usab ni  Police Colonel Abubakar Udang Mangelen Jr.  Provincial Director sa Cebu Police Provincial Office (CPPO) nga ang operasyon kabahin sa padayon nga kampanya batok sa illegal nga armas.

Ang nadakpan nga suspek kasamtangang gitanggong sa custodial facility sa Danao City Police Station ug giandam na ang pagpasaka og kaso ilawom sa Republic Act 10591 o Comprehensive Firearms and Ammunition Regulation Act. (BANAT NEWS)