EMB-7: Hangin sa Talisay “very unhealthy”
CEBU, Philippines — Ang Environmental Management Bureau (EMB)-7nipagawas kagahapon sa alas 8:00 sa buntag sa air quality monitoring report nga nagpakita og nagkalain-laing kondisyon sa hangin sa tibuok Metro Cebu diin ang Dakbayan sa Talisay nakatala og “very unhealthy” nga lebel sa PM2.5 base sa official nga datos gikan sa monitoring station.
Sa CAAQMS–Talisay Station, niabot ngadto sa 45.3 µg/Ncm ang PM2.5 nga giingong “very unhealthy,” samtang ang PM10 nagpabilin sa “fair” nga lebel uban sa reading nga 62 µg/Ncm.
Ang Air Quality Index (AQI) alang sa very unhealthy nga kondisyon kasagarang anaa sa 151–200 pataas nga range diin nagpasabot kini og taas nga polusyon nga mahimong adunay seryosong epekto sa panglawas.
Ang EMB-7 nipasidaan nga ang dugay’ng exposure sa taas nga PM2.5 levels mahimong delikado ilabina sa mga adunay sakit sa kasing-kasing ug baga ingon man sa mga bata ug senior citizens.
Posibleng epekto niini mao ang iritasyon sa respiratory system, pagsakit o kabug-at sa dughan ug paggrabe sa sentomas sa asthma.
Giawhag ang mga residente nga magpabilin sulod sa balay siradohan ang mga bintana, mogamit og air purifiers kon adunay magamit ug magsul-ob og protective masks kon mogawas aron mamenosan ang exposure sa polluted nga hangin.
Narekord usab ang wind speed sa maong lugar nga mga 2–3 metros matag segundo, nga mahimong adunay epekto sa pagkatag sa pollutants apan dili pa igo aron dali nga mapaayo ang kondisyon sa air quality.
Samtang, ang air quality data gikan sa Toledo monitoring station wala pa ma-access sa oras sa pagsuwat niining balita nga nakapugong sa hingpit nga assessment sa kondisyon sa kasadpang bahin sa Sugbo.
Dugang sa EMB-7 nga padayon nilang higpit nga gibantayan ang air quality levels sa tibuok Metro Cebu ug gilaoman nga magpagawas pa og dugang nga updates kon gikinahanglan alang sa giya sa publiko.
- Latest















