Community-Based Monitoring System gisugdan sa DSWD

CEBU, Philippines —  Gisugdan sa Department of Social Welfare and Development-7 (DSWD-7) ang paggamit sa Community-Based Monitoring System (CBMS) isip opisyal nga himan sa pag-target alang sa Social Pension Program for Indigent Senior Citizens (SPISC), nga nagtimaan sa dakong kausaban sa paagi sa pag-ila ug pagberipika sa mga benepisyaryo sa tibuok Region VII.

Ubos niining bag-ong sistema, ang Philippine Statistics Authority (PSA) maoy mohimo sa masterlist sa mga kwalipikadong benepisyaryo pinaagi sa CBMS, diin ang edad maoy nag-unang basehan sa eligibility nga parehas nga ipatuman sa tanang rehiyon. Sa pagkakaron, nakapokus ang DSWD-7 sa pagberipika sa masterlist nga gihimo sa PSA aron maminusan ang posibleng external influence sa proseso sa pagpili sa mga benepisyaryo.

Usa sa mahinungdanong epekto sa paggamit sa CBMS mao nga ang gidaghanon sa bag-ong malistang benepisyaryo dili na konektado sa gidaghanon sa mga matangtang sa listahan.

Tungod kay ang eligibility gibase sa age-based data gikan sa CBMS ug dili sa fixed quota, ang pagpuli sa mga delisted nga senior citizens magdepende na sa aktuwal nga ihap sa mga kwalipikadong indibidwal nga ma-identify sa sistema, aron maseguro nga ang pag-apil sa programa patas ug base sa datos.

Kabahin usab niini, gisugdan sa mga kawani sa DSWD-7 ang implementasyon sa Basta Beripikado, Mabilis ang Serbisyo (BBMSerbisyo) online application alang sa National ID verification sa mga benepisyaryo.

Kini nga inisyatibo nagsuporta sa mas lapad nga tumong sa gobyerno alang sa digitalized, transparent, ug episyenteng paghatag sa social protection services.

Ang Social Pension Program naghatag og quarterly stipend ngadto sa mga indigent senior citizens nga adunay edad 60 anyos pataas ug walay nadawat nga pensyon gikan sa gobyerno o pribadong sektor.

Pinaagi niining mga institutional improvements, padayon nga gipalig-on sa DSWD ang integridad sa programa ug gipasiugda ang kaayohan sa labing bulnerableng tigulang nga populasyon sa rehiyon.