Butane, plantsa gidudahan

CEBU, Philippines — Moabot sa 32 ka pamilya ang nawad-an og panimalay human miigo ang sunog sa usa ka residential area sa Sitio Admacor, Barangay Maguikay, Mandaue City, Cebu kagahapon sa hapon, Mayo 15, 2026.

Sa pakighinabi sa Banat News, si Barangay Captain Eduardo Gumera miingon nga base sa ilang initial assessment, mga 89 ka indibidwal ang naapektuhan human masunog ang 23 ka mga balay tungod sa insidente.

Walay na record nga samdan o namatay sa maong hitabo.

“Ako pag action palang og kayo didto nako, ako silang giingnan nga pag kalma lang mo, i-safety lang gyud ang kinabuhi, bahala nalang ng mga butang ninyo dinha,” matud ni Gumera.

 Matud niya kadaghanan sa mga balay sa lugar ginama  sa mga light materials maong paspas ang pagkuyanap sa kalayo. Miingon pud siya nga ang grabeng kainit sa panahon posibleng nakadugang sa insidente.

“Usahay lagi malimot og amping, mao ning hitaboa,” matud niya.

Base sa inisyal nga imbestigasyon, posible nga ang hinungdan sa sunog kay mibuto nga butane canister nga gipasagdan samtang nagluto.

“Gibiyaan, basin nagluto siguro, mao ‘toy akong nakuha sad na istorya,” matod ni Gumera. Apan, adunay pipila ka residente nga miingon nga posibleng gipasagdan nga plantsa ang nakaingon sa sunog.

Sumala sa Mandaue City Disaster Risk Reduction and Management Office (CDRRMO), niabot ang report sa sunog alas 3:11 sa hapon, gi-raise ngadto sa second alarm alas 3:20 sa hapon, ug gi-deklarar nga under control alas 3:58 sa hapon.  Gi-report sa Mandaue Bureau of Fire Protection (BFP) nga fire out na alas 4:53 sa hapon. Sa pagsuwat niining balita, wala pa madeterminar ang balor sa kadaut samtang nagpadayon pa ang assessment sa mga otoridad.

Ang mga apektadong pamilya temporaryong magpuyo sa Maguikay Elementary School, sumala ni Gumera, samtang ang City Social Welfare Services (CSWS) nagpadayon sa pagkompleto sa listahan sa mga apektadong residente.

Giila usab sa barangay kapitan nga dugay nang giisip nga fire-prone area ang maong lugar. “Kani na area, mao ni sa usa sa mga prone areas nako diri,” matod niya.

Gipahimangnoan niya ang mga residente nga magpabilin nga mabinantayon ilabina karon nga init ang panahon.

Gitambagan usab niya ang hustong pag-atiman sa mga electrical appliances ug wiring aron malikayan ang susamang insidente.

“Ang importante kaning mga electrical nga mga gamit kailangan i-off gyud kung wa na gamita, tangtangon gyud sa mga connection,” dugang niya, ug miingon nga dili gyud matag-an ang aksidente.

Giapod-apod usab sa CSWS ug City Mayor’s Office (CMO) ang hot meal packs alang sa mga apektadong residente, samtang ang Barangay Health Workers (BHW) naka-standby sa evacuation area. IBM BANAT NEWS