Tulo ka team enforcers gitaktak

CEBU, Philippines — Subling gipalanog sa Mandaue City Government ang ilang zero-tolerance policy batok sa bribery, extortion, ug tanang porma sa kurapsyon sa mga hiwing binuhatan sa pipila ka kawani sa city hall.

Ang maong pamahayag migawas human gipangtaktak  sa serbisyo ang tulo ka personnel sa Traffic Enforcement Agency of Mandaue (TEAM) tungod sa alegasyon  og pagpangilkil sa mga motorista aron di sila tiketan sa ilang traffic violations.

Sa interview niadtong Mayo 15, si Atty. Gonzalo Malig-on Jr. miingon nga gawas sa tulo ka traffic enforcers, adunay laing tulo ka traffic personnel nga namaymayan tungod sa mga kalapasan.

“Sa policy sa Mayor (Thadeo Jovito “Jonkie” Ouano) zero tolerance ta anang mga ingon ana, nangotong,” matud pang Malig-on.

Ang laing tulo ka personnel wala nalambigit sa kuwarta apan nasakpan nga sila mismo wala motahod sa traffic rules sama sa pagkapyot sa jeepney, pag-cut og lane, ug pagsaka sa center island gamit ang motorsiklo aron makalikay sa trapiko. Dugang ni Malig-on nga seryoso ang city government sa pagtangtang sa mga trabahanteng magpabadlong.

Ang city administrator midugang nga tungod kay estrikto ang pagpatuman sa traffic rules ngadto sa mga tawo sa Mandaue City, kinahanglan usab nga patas ang pagtratar sa mga personnel nga molapas sa balaod.

Sa laing interview sa mga tigbalita, si TEAM Head Hyll Retuya miingon nga milihok ang ahensya human mikatap sa social media ang mga video ug hulagway nga nagpakita sa ilegal nga gipangbuhat sa maong mga enforcers.

Sa usa ka kaso, usa ka enforcer ang gipasanginlang nangayo og P1,000 gikan sa usa ka drayber pinaagi sa pagpanghadlok nga mas dako kuno ang penalty kung sa opisina bayran ug adunay mandatory seminar.

Giklaro ni Retuya nga ang maong violation dili man kinahanglan og vehicle impoundment.

Midugang siya nga ang mga seminar gikinahanglan lamang sa mga impoundable offenses ug kasagarang molungtad og mga usa ka oras, ug wala kini magamit sa kaso sa biktima.

GIhadlok sa enforcer nga P3,000 ang multa pero matud pang Retuya, P1,000 hangtod P1,500 lang ang multa sa maong violation.

Katong usa sad, nangayo og kuwarta pang snacks aron dili isyuhan og tiket ang nakalapas nga drayber.

Ang tulo ka personnel miagi sa legal proceedings ug due process sa wala pa sila gitangtang sa serbisyo. Sumala ni Retuya, giangkon sa mga personnel ang mga sala human sila mapresentahan og ebidensya. IBM BANAT NEWS