Cebu City nilugway sa four-day work week

CEBU, Philippines — Pormal nga gilugwayan sa Cebu City Legislative Department ang compressed four-day work week scheme karong semanaha kini subay sa direktiba ni Bise Mayor Tomas Osmeña.

Samtang, gipadayon sa executive department ang lima ka adlaw nga schedule niini diin giklaro ni Mayor Nestor Archival, Sr. nga wala siya mosupak sa arrangement sa legislative branch.

Base sa memorandum nga pinetsahan og Mayo 4, 2026 gimando ni Osmeña ang tanang legislative personnel sa pagtuman sa pagpadayon sa compressed work week.

Gipasabot sa bise mayor nga ang extension gikinahanglan subay sa kalibutanong mga hagit sa ekonomiya, pagsaka sa presyo sa lana, ug kawalay kasigurohan nga supply.

Gihatagan niya og gibug-aton nga ang laraw nagpakita na og positibo nga mga sangpotanan, ilabi na sa pagkunhod sa konsumo sa enerhiya ug gasto sa transportasyon.

Ang memorandum nagmando sa tanang hingtungdan nga mga buhatan ubos sa legislative department sa pagpadayon sa polisiya.

Epektibo unta ang maong laraw sa niaging semana apan ang pagpatuman niini naapsan sa deklarasyon sa Malacañang nga special non-working holidays sa Cebu City, Mandaue City, Lapu-Lapu City, ug Cordova gikan Mayo 6 hangtud sa 8, 2026.

Ang pagsuspenso gimando ubos sa Proclamation No. 1239 aron mapaloag ang trapiko ug mapalig-on ang mga lakang sa siguridad atol sa 48th ASEAN Summit ug related meetings nga gipahigayon sa Sugbo.

Sayo pa, gitapos ni Archival ang compressed schedule sa mga executive offices ug gibalik kini sa regular nga lima ka adlaw nga semana sa trabaho. Gipasabot niini nga wala siya mosupak sa pagpadayon sa legislative department sa laraw diin lahi ang ilang gimbuhaton sa mga operasyon sa executive.

Matud ni Archival nga si Osmeña nihatag kaniya og heads-up bahin sa extension.

Unang gisagop sa Dakbayan sa Sugbo ang compressed work week niadtong Abril 6, 2026 ubos sa Executive Order No. 069 diin ang mga empleyado nagtrabaho matag Lunes hangtud sa Huwebes gikan sa alas 8:00 sa buntag hangtud sa alas 6:30 sa gabii aron makompleto ang 40 ka oras kada semana. Gikan sa The Freman, BDB BANAT NEWS