Serbisyo sa CCMC adunay pabor-pabor?

CEBU, Philippines — Nimando si Cebu City Mayor Nestor Archival, Sr. sa kadagkoan sa Cebu City Medical Center (CCMC) nga aksiyonan dayon ang mga reklamo batok sa giingong pabor-pabor nga sestema sa ospital human nga adunay nipadangat og reklamo nga giingong unahon og atiman sa mga nurse ang mga kaila niini nga mga pasyente.

Nitumaw ang maong isyu diha sa social media human nga nipasangil diha sa Facebook ang username nga si “Kent Yal” ngadto sa usa ka grupo sa senior citizen ug giingong pipila ka kawani sa CCMC ang niuna sa pagtagad sa ilang mga kaila kompara sa ordinaryong pasyente ug adunay dili maayong pagtagad sa mga nangutana mahitungod sa mga serbisyo sa ospital.

Sa iyang bahin, si Archival nagkanayon nga daghang mga pasyente ang giserbisyohan sa CCMC matag adlaw ug dili malikayan nga adunay mga pasyente nga dili maatiman dayon tungod kay limitado lang ang kawani sa ospital.

Giangkon usab sa mayor nga daghan sa department heads sa pasilidad ang dugay na nga nagpabilin sa ilang posisyon ug posible nga adunay mga naandan nga sestema nga nagpadayon hangtud karon.

Matud ni Archival nga dili usab maayo nga ilahos diha sa social media ang pagpadayag sa kahiubos sa serbisyo sa ospital o ang mga kakuwang sa serbisyo sa kagamhanan.

 Nimando ang mayor sa tanang department heads ilabi na sa CCMC nga sugod sa sunod semana magbutang na og dagkong signage nga adunay mensahe nga “How can we serve you more?” uban sa mga numero sa telepono diin mahimong ipadangat ang ilang feedback ug mga reklamo.

Giawhag usab ni Archival ang publiko nga likayan ang pagyagyag og impormasyon diha sa social media ug mas maayo nga ilahos kini og padangat sa lokal nga kagamhanan pinaagi sa Cebu City News aron malikayan ang pagpakatap sa sayop nga impormasyon.

Gipadayag ni Archival nga seryoso ang siyudad sa pag-aksyon batok sa mga mitumaw nga reklamo. BDB BANAT NEWS