Engkwentro, usa patay

CEBU, Philippines — Nasikop sa kapulisan ang usa ka gituohang gunman sa pagpatay sa usa ka lalaki sa Balamban, Cebu human sa hot pursuit operation nga misangpot sa armadong engkwentro niadtong Lunes sa hapon, Mayo 11, 2026, sa Sitio Himombungan, Barangay Cantuod, sa maong lungsod.

Giila sa mga otoridad ang nadakpang suspek nga si Jehu Montero De Vila, 18,  residente sa Sitio Combado  sa maong barangay.

Nadakpan usab si Alvan Mark Tablate, 40, nga residente sa maong barangay.

Samtang si Rachel Artajo, residente sa maong lugar ang  namatay human giingong nakigpinusilay sa mga operatiba  atol sa operasyon.  Naluwas usab  ang usa ka 15-anyos nga menor de edad.

Matud pa sa Balamban Municipal Police Station (MPS), gilusad ang operasyon alas 4:30 sa hapon kalabot sa pagpusil-patay kang Roque Batalona Villamor alas- 4 sa kaadlawon niadtong Mayo 10 sa maong barangay.

Sumala sa imbestigasyon, adunay testigo nga positibong miila kang De Vila nga maoy mipusil patay kang Villamor maong ilaha ning gipangita.

Apan matud pa sa mga polis, pag-abot nila sa maong lugar, nakabantay si Artajo ug giunhan sila niini sa pagpusil.

Naigo si Police Corporal Jonel Dela Cruz apan swerte nga nagsuot siya og bulletproof vest kini. Mibalos og pusil ang mga operatiba  hinungdan nga naigo si Artajo. Gidala siya sa Cebu Provincial Hospital sa Balamban apan gideklarang dead on arrival sa mga doktor.

Human niini, gidakop si De Vila ug Tablate tungod sa kasong illegal possession of firearms, illegal drugs, ug drug paraphernalia.

Gikordon dayon sa Balamban police ang lugar ug nakigkoordinar sa SOCO sa Regional Field Unit 7 aron pagproseso sa crime scene.

Samtang stable na ang kahimtang ni PCpl. Dela Cruz, padayon pa ang imbestigasyon sa kapulisan aron matino ang motibo sa pagpatay kang Villamor ug uban pa nga may kalabutan sa insidente. IBM BANAT NEWS