Nang-scam og alahas online
CEBU, Philippines — Kapin sa P1 milyon nga kantidad sa mga alahas nga giingong nakuha pinaagi sa online scam maoy hinungdan sa pagkadakop sa usa ka 28-anyos nga babaye atol sa entrapment operation nga gihimo sa Carbon Police Station 5 sa Barangay Mambaling, Cebu City niadtong Domingo sa gabii, Mayo 10, 2026.
Ang suspetsado giila nga si Janet Amadora Brago, residente sa Barangay Inayawan, Cebu City. Ang operasyon mitumaw human sa reklamo nga gisang-at sa tag-iya sa usa ka jewelry store nga nahimutang sa Barangay Pahina Central, Cebu City.
Matud pa sa biktima nga nangayo ang suspek sa bank details aron mag bank to bank transfer ipaagi ang bayad.
"Gi-check nako ang through company account didto nako nakita nga naka float ang payment ang ila diay gigamit naa jud siya deceitful act kay ngano ilang gi send sa among Facebook page online transfer and to find out afterwards pag check nako online banking makita man nako details tanan Checky ilang gi deposit doble kara ilang gibuhat," matud sa biktima.
Sa pakighinabi sa Banat News, ang dinakpan miingon nga igo lang siya gisugo ss iyang amo. "Gisugo raman ko sa akong amo," pangangkon pa ni Brago.
Sa imbestigasyon sa kapulisan, usa ka tawo nga migamit sa ngalang “Maven Theodore” ang giingong nakigtransaksyon online sa jewelry shop.
Matud sa kapulisan, mikontak pag-usab ang suspetsado sa complainant ug misulay pagpalit og dugang mga alahas pinaagi gihapon sa online nga maoy hinungdan sa pagpahigayon sa entrapment operation.
Mga alas 6:30 sa gabii, nasikop ang suspetsado sa Ocean Park sa Barangay Mambaling human giingong personal niyang gidawat ang mga alahas gikan sa complainant.
Karon anaa na sa kustodiya sa kapulisan ang suspetsada ug giandam na ang kasong estafa ubos sa Article 315 sa Revised Penal Code kalabot sa conspiracy ubos sa Article 8 ug Section 6 sa Cybercrime Prevention Act of 2012. IBM BANAT NEWS
- Latest
