Mabanta ug mga kauban, nakapiyansa
MANILA, Philippines — Nakabutang na og piyansa ang online personality nga si Franco Mabanta ug upat niya ka mga kaubanan kagahapong adlawa, Sabado, human sila gidakop sa entrapment operation tungod sa alegasyong pagpangilkil nila kang kanhi House Speaker Martin Romualdez.
Ang Pasig Regional Trial Court (RTC) Branch 167 miisyu og release order human si Mabanta ug upat ka mga kaubanan nakabayad og tagsa-tagsa nila ka piyansa nga tag P120,000.
Ang National Bureau of Investigation (NBI) miingon nga silang Mabanta, kinsa maoy founder sa Peanut Gallery Media Network (PGMN) ug mga kaubanan niini gipaubos na sa inquest proceedings human sila nadakpan entrapment operation sayo niining semanaha.
Ang NBI mialegar nga gikilkilan sa grupo og P300 million si Romualdez baylo sa dili nila pag-post og video nga giingong mag-link kaniya sa kontrobersiyal nga flood control projects. Ang kaso gipasaka ubos sa paglapad sa Article 294 sa Revised Penal Code.
Si Mabanta kusganong mihimakak sa mga gipasangil kanila ug mihulagway sa tanan nga sila gi “setup” ug andam siyang pamatud-an ang tanan nga inosente siya.
Dili palang dugay, gikompirmar sa Malacañang nga si Mabanta maoy nahimong social media director ni President Ferdinand Marcos Jr. sulod sa unom ka buwan niadtong 2018.
Si Palace Press Officer Claire Castro miingon nga gitangtang si Mabanta tungod sa iyang “style.” Giklaro sab ni Castro nga walay kalambigitan si Mabanta sa 2022 presidential campaign ni Marcos.
Una nang nangangkon si Mabanta sa social media nga nakatrabaho siya kaniadto isip social media director sa kampo ni Marcos. (BANAT NEWS)
- Latest
