Bata gipusposag bangko ug dos por dos

CEBU, Philippines — Gitanggong sa karsel ang usa ka 42-anyos nga lalaki human giingong iyang gipusposan og bangko ug dos por dos ang 8-anyos nga anak sa iyang kapuyo diha sa Sitio Upper Kalunasan, Barangay Kalunasan, dakbayan sa Sugbo sayo ning semanaha.

Ang dinakpan nga si Nerio Ingtapan Arcos, samtang gitago sa Banat News ang pangalan sa menor-de-edad nga biktima. Base sa imbestigasyon sa Guadalupe Police Station 4, nahitabo ang pagpangulata alas 9:40 sa gabii. niadtong Miyerkules, Mayo 6. Matud pa sa kapolisan ang biktima gibunalan sa ulo sa sa maong suspek gamit ang usa ka plastic nga bangko kay nayabo niini ang bugas.

Wala pa gyud matagbaw gipusposan niya og dos por dos ang mga batiis ug bukton sa bata hinungdan sa grabeng mga bun-og ug pangos sa bata. Buntag na sa Mayo 7 ayha pa naabot sa mga otoridad ang pagpangabuso human nangayo og tabang ang guardian sa bata ngadto sa mga barangay tanod sa Kalunasan.

Ang suspek mag-atubang siya og kasong may kalapasan sa Republic Act 7610 o ang Special Protection of Children Against Abuse, Exploitation and Discrimination Act of 1992.—  IBM BANAT NEWS