Gidunggab sa pasaherong hubog

CEBU, Philippines — Nasamdan ang usa ka 26-anyos nga pasahero human kini kalit gidunggab sa laing pasahero samtang sakay pa sila og pasaheroang bus diha sa Sitio Campo, Barangay Guadalupe, dakbayan sa Carcar niadtong Huwebes sa hapon, Mayo 7.

Ang biktima giila nga si Ronald Tranate Castro, residente sa Barangay Poblacion lungsod sa Asturias. Samtang ang suspek mao taga Roel Patoc Temple, taga Sitio Jagna, Barangay Nagbalaye, lungsod sa Santa Catalina sa probinsya Negros Oriental.

Base sa inisyal nga imbestigasyon sa Carcar City Police Station, nahitabo ang insidente pasado alas 3:30 sa hapon samtang si Castro ug Temple parehong sakay sa usa ka pampasaherong bus nga paingon sa habagatan.

Ang biktima nisakay sa bus gikan sa Barangay Lawaan, dakbayan sa Talisay, samtang ang suspek misakay sa dapit sa lungsod sa San Fernando.

Ang biktima nitug-an nga ang suspek gituohang niini nga nakainom nagpakita og kadudahang mga lihok, nagsige ni og balik-balik og barug, naglingo-lingo sa palibot, ug manutok sa ubang mga pasahero, ilabi na sa pasaherong babaye nga naglingkod duol kaniya.

Apan pag-abot sa nahitaboan kalit niining gidunggab ang biktima bisan wala unsaa. Nakasagang ang biktiman apan nalahus sa iyang dughan ang kutsilyo hangtud nga naglayog sila ug nadisarmahan kini.

Gihatod dayon ang biktima ngadto sa Cebu Provincial Hospital sa Carcar samtang gidakop sa mga barangay tanod ug gidakop ang suspek ug gi-turnover sa mga mirespondeng kapulisan apil ang 18-pulgadas nga plamingko.

Sa pagsuwat niining balitaa, si Temple nagpabilin na gitanggong sulod sa custodial facility sa Carcar City Police Station ug gikatakdang mag-atubang og kasong attempted homicide.—  IBM BANAT NEWS