Aksidente sa kadalanan sa Cebu City nisaka

CEBU, Philippines — Misaka pag-ayo ang mga aksidente sa kadalanan sa Cebu City sa unang kwarter sa 2026, diin ang mga otoridad sa trapiko nagtala og hangtod 55 ka insidente sa usa lang ka adlaw, sumala sa datos sa Cebu City Transportation Office (CCTO). Base sa datos sa CCTO, ang pinakataas nga gidaghanon sa mga aksidente sa dalan natala niadtong Pebrero 9, 2026, nga may 55 ka kaso sa usa ka adlaw. Gisundan kini sa 52 ka insidente niadtong Enero 12, 46 niadtong Marso 6, ug 39 niadtong Abril 6.

Sa kinatibuk-an, nakatala na ang syudad og 3,532 ka road accidents karong tuiga, nga nagpakita sa padayon nga pagtaas sa mga insidente sa trapiko.

Ang pagtaas sa mga aksidente giubanan usab sa pipila ka mga kaso nga nakamatay sa mga miaging bulan.

Lakip niini ang hit-and-run nga insidente nga miapil sa negosyante nga si Kingston Ralph Ko Cheng sa Banilad niadtong Pebrero 2026, ang pagkamatay sa mechanical engineering student sa University of San Carlos nga si Nicole Kwek, ug usa ka bag-ong kaso diin usa ka 14-anyos nga bata ang naligsan og modernong public utility jeepney niadtong Mayo sa Bario Luz.

“Follow lang gyud ‘ta sa batas trapiko unya dili nato ipairal ang gitawag nga kamote driver kay usa na sa mga naka-cause sa road accidents. Kanang dili ta mosunod sa traffic rules,” miingon ang usa sa mga residente sa Cebu City  nga si Leonard Paca nga hapit na 16 ka tuig nga nagmaneho. Ang mga traffic enforcer usab nagpahimangno sa mga motorista nga mag-amping pirmi ilabi na kay nagkagrabe ang problema sa kaluwasan sa dalan.

“Ang ako lang gi-advise aning mga motorista, amping lang gyud ta kanunay [aron] safety atong pagbiyahe,” miingon ang traffic enforcer nga si Nolito Ylanan.

Sa usa ka press conference niadtong Mayo 4, miingon si Cebu City Mayor Nestor Archival nga adunay ipahigayon nga Traffic Management Coordination Council meeting aron hisgutan ang dugang nga training, pagpalig-on sa inter-agency coordination, ug pagpaayo sa sistema sa enforcement alang sa kaluwasan sa publiko.

“I was actually talking to CCPO nga kinahanglan mag-stricter gyud ta sa implementasyon,” miingon si Archival.

“We will be pushing really hard nga ang atong implementation para sa safer cities ato gyud ni panindotan,” dugang niya dungan sa pag-ingon nga kakulang sa disiplin sa mga drayber ug pagmagahi nila pagtambong og seminars ug orientations ang mga hinungdan sa pagtaas sa aksidente.

Senate Bill No.2078

Sa pikas bahin, usa ka balaudnon ang giduso karon sa Senado aron amendahan ang kasamtangang Republic Act 10586 o ang Anti-Drunk and Drugged Driving Act of 2013 tungod sa mga nakitang kasaypanan sa implimentasyon niini sa mga imbestigador sa mga aksidente sa kadalanan.

Gipangamahanan ni Senador Francis Escudero ang Senate Bill No. 2078 nga giduso niya niadtong Mayo 4.

Kini nga balaudnon nagtinguha nga palig-onon ang balaod batok sa pag-drayb ubos sa impluwensya sa alkohol ug ilegal nga droga.

Kun mahinumdoman nahimong kontrobersiya ang imbestigasyon may labot sa aksidente nga mikalas sa kinabuhi sa 23-anyos nga Cebuano entrepreneur nga si Kingston Ralph Cheng sayo ning tuiga.

Ang pamilya ni Cheng nanawagan alang sa mas lig-on nga pagpapatuman sa road safety ug accountability. Kini human nila nasuta nga wala dayun mapaubos sa alcohol test ang drayber nga nakadasmag sa ilang anak ug nilabay pa ang mga oras ayha kini gihimo diha sa usa ka pribadong tambalanan diin kini nagpa admit human sa aksidente.

Ang balaudnon ni Escudero nga giulohan og “An Act Strengthening Mechanisms Against Driving Under the Influence of Alcohol, Dangerous Drugs, and Other Similar Substances”  nagtinguhang matarong na ang pagimbestigar sa mga aksidente sa kadalanan kay tungod sa mga kakulang sa mga gamit og implimentasyon nahikawan sa hustisya ang mga nabiktima. — Mitchelle L. Palaubsanon/IBM BANAT NEWS