Ni-overtake, duha patay

CEBU, Philippines — Patay ang duha ka mga mga lalaki, usa niini menor de edad human ang gisakyan nilang motorsiklo mibangga sa usa ka van samtang sila nag-overtake sa nag-una nila nga sakyanan diha sa national highway sa Barangay Pitalo, lungsod sa San Fernando sa Sugbo niadtong Huwebes sa kadlawon, Mayo 7.

Ang mga nakalas mao ang 16-anyos nga drayber sa motorsiklo ug ang iyang 18-anyos nga backrider. Ang duha pulos residente sa Barangay South Poblacion sa samang lungsod.

Matod pa sa mga otoridad, wala nagsuot og helmet ang duha ka mga biktima dihang nahitabo ang aksidente ug wala usab driver's license ang nagmaneho sa motorsiklo. Samtang ang van nga nalambigit sa pagkabangga gimaneho ni alyas "Ian", 43, residente sa sitio Pool, Barangay Bankal, dakbayan sa Lapu-Lapu.

Base sa inisyal nga imbestigasyon sa San Fernando Municipal Police Station, nahitabo ang insidente mga alas 3:35 sa kadlawon, samtang ang duha ka mga sakyanan nagbiyahe sa managlahing direksyon.

Paingon sa habagatan ang motorsiklo, samtang paingon sa amihanan ang van. Gibutyag sa kapulisan nga kalit nga ni-overtake ang motorsiklo sa usa ka sakyanan sa atubangan niini ug ni-counter flow sa pikas lane hinungdan nga nagka head on collision ang duha.

Tungod sa impact sa panagbangga, nalagpot ang mga biktima sa karsada ug nakaangkon og grabeng mga kadaot sa ilang kalawasan nga miresulta sa ilang hinanaling kamatayon.

Ang drayber sa van gidala usab sa tambalanan alang sa dinalian nga pagpatambal human nakaangkon og gamay nga samad sa pagkabangga.

Human niini, dayon siya sa kustodiya sa pulisya, samtang nagpadayon pa og imbestigasyon ug pagpasaka og kaso sa mga pamilya sa mga nangamatay batok kaniya.

Sa pagsuwat ning balita padayon pang gisusi kung kinsay sad-an sa maong insidente. (BANAT NEWS)