Drugas, armas nasakmit

CEBU, Philippines — Nadakpan sa mga sakop sa Cebu City Police Office (CCPO) ang  usa ka drug suspect ug duha ka armadong tawo sa nagkalain-laing operasyon sa Barangay Tisa, Kalunasan, ug Labangon sa Cebu City niadtong Mayo 5 ug 6, 2026.

Ang pagpahugot sa seguridad ug anti-criminality operations kabahin ni sa internasyonal nga kalihokan sa ASEAN Summit nga gihimo dinhi sa Sugbu particular sa Lapu-Lapu City.

Ang buy-bust operation nga gipahigayon sa mga operatiba sa Police Station 10, Labangon nahitabo diha sa Sitio Chicos, Barangay Tisa, Cebu City alas 7:30 sa gabii niadtong Mayo 5, 2026. Nakuha gikan sa suspek ang gibanabanang 5.15 gramos sa gidudahang shabu nga adunay Standard Drug Price (SDP) nga mokabat sa P35,020. Samtang, duha usab ka armadong indibidwal ang nadakpan sa magkalahing operasyon sa Police Station 9 ug Police Station 10 tungod sa tip sa mga residente bahin sa mga armadong tawo sa ilang komunidad.

Sa report sa Police Station 9 miresponde ang mga kapulisan sa alarma sa armado nga tawo sa Sitio Langub, Barangay Kalunasan, Cebu City alas 1:00 sa kaadlawon niadtong Mayo 6, 2026. Naabtan sa mga operatiba ang suspek alas 1:45 sa kaadlawon ug nasakpan kini nga nagdala kini og .357 revolver nga adunay duha ka bala.

Sa laing operasyon, miresponde usab ang Police Station 10 sa alarma sa armadong tawo sa Sitio Upper Bonbonan, Barangay Labangon, Cebu City alas 7:00 sa gabii niadtong Mayo 5, 2026. Nadakpan sa mga pulis ang lalaking residente sa maong lugar human  nasakpan nga duna siyay .22 revolver nga  adunay duha ka bala. Giawhag usab sa CCPO ang publiko nga magpabiling alerto ug motaho dayon sa kapolisan kun duna silay makit-ang mga kadudahang mga tawo. (BANAT NEWS)