MCWD nangandam sa huwaw

CEBU, Philippines — Nangandam na ang Metropolitan Cebu Water District (MCWD) alang sa pagtabang sa kagamhanan sa Dakbayan sa Sugbo kung ugaling mograbi ang epekto sa El Niño o huwaw sa syudad.

Sa pagpakighinabi ngadto kang Atty. John DX Lapid , bag-ong general manager MCWD, nakighimamat na siya kang Mayor Nestor Archival aron nga matuki ang mga lakang aron malikayan ang grabeng kakuwang sa tubig ug masiguro ang padayon nga serbisyo panahon sa huwaw.

Base sa assessment nga gisumitir sa MCWD ug sa mga pagbana-bana sa kahimtang sa panahon sa Philippine Atmospheric, Geophysical and Astronomical Services Administration (PAGASA), gilauman ang taas nga panahon sa huwaw nga magsugod sa kataposang bahin sa tuig.

Gibanabanang posibleng kuwangon og 43,000 cubic meters nga tubig matag adlaw tungod sa pagkunhod unya sa produksyon gikan sa mga tinubdan sa tubig sama sa Buhisan Dam, Cotcot River sa Compostela, ug Lusaran River ug Jaclupan Water Facility sa Dakbayan sa Talisay.

Tungod niini, si Lapid miingon nga nakaplastada na ang ilang inisyal nga tabang sa mga residente sa syudad lakip na ang mga dili konsumidor sa MCWD.

Ang MCWD nagsugod na sab sa pag-drill og well site Barangay Kalunasan, ug adunay mga well sites nga ipaubos og pag-drill sa walo tunghaan sa habagatang distrito sa syudad sa umaabot.

Dugang pa, duna say expansion sa Apas, pagpalapad sa operasyon sa Opao ug Mambaling desalination facilities, ug ang Cordova pipeline project nga kauban ang Vivant Corporation.

Gawas niana, magpakatap sab og Mobile Siphon Tanks (MST) aron matabangan ang mga barangay nga wala maabot sa main water grid, sama sa Barangay Cabinocot ug Bonbon, aron masiguro ang dugang suplay sa tubig sa panahon sa ting-init.

Giklaro ni Lapid nga dili kini basta-basta mohatag og tubig sa mga water tankers nga dili iya sa kagamhanan gumikan kay kinahanglan kini nga rehistrado aron nga matala ang mga plate number niini. 

“Only authorized by the Cebu City government ang hatagan og tubig sa MCWD. Because there’s a lot of mountain barangays of Cebu City who are extracting water hydrants without our authorization. And they are selling the waters in high prices in mountain barangays,” suma pa ni Lapid.

Iphon sab sa MCWD kung pila ka trak ang gihatagan og tubig gikan sa mga fire hydrants. Gipahibalo ni Lapid nga ang tubig nga ihatag sa syudad libre lang ug kuhaon kini gikan sa non-revenue water.

“We will not be charging the Cebu City Government for this water extracted, libre ni siya. Amoa gyud ni nga tabang sa syudad,” suma pa ni Lapid.

Ang MCWD padayon nga nakipagtambayayong sa kagamhanan aron nga dili dako ang epekto sa huwaw sa mga lumulupyo sa syudad. (BANAT NEWS)