Skeletal workforce ipatuman sa Kapitolyo sud sa tulo ka adlaw

CEBU, Philippines — Adunay skeletal workforce nga nagpadayon sa operasyon sa Cebu Provincial Capitol sugod kagahapon Mayo 6 ngadto sa 8, 2026, human sa deklarasyon sa special non-working days sa mga lugar sa Metro Cebu nonot sa mga kalihukan sa 48th ASEAN Summit.

Ang maong adjustment gihimo human sa pag-isyu sa Malacañang sa Proclamation No. 1239, nga nagpalapad sa coverage sa holidays nga naglangkub na sa Cebu City, Mandaue City, Lapu-Lapu City, ug sa lungsod sa Cordova.

Sa memorandum nga gipetsahan og Mayo 6, 2026 si Provincial Administrator Joseph “Ace” H. Durano nikompirmar sa pagsuspenso sa trabaho sa mga buhatan sa Kapitolyo sulod sa tulo ka adlaw.

Apan bisan pa sa maong suspension, dunay mga frontline ug essential offices ang gi- require nga magpabilin ang operasyon ubos sa skeletal workforce arrangement.

Naglakip niini ang Provincial Tourism Office, Provincial General Services Office (PGSO), Provincial Disaster Risk Reduction and Management Office (PDRRMO), Provincial Engineering Office (PEO), Provincial Social Welfare and Development Office (PSWDO), Provincial Health Office (PHO), ug Provincial Governor’s Office (PGO).

Giklaro usab sa Kapitolyo nga ang mga naka skedyul nga kalihukan magpadayon segun sa nakaplano bisan pa sa work suspension. — MEL (BANAT NEWS)