Daghan nagbagolbol sa uwahi nga pahibawo sa holiday

CEBU, Philippines — Nasinati sa mga trabahante ug estudyante ang dakong kalibog ug kapungot kagahapon, Mayo 6, 2026, human sa kalit nga pag-anunsyo sa Malacañang sa pagpalapad sa special non-working holiday alang sa kalihukan sa ika-48 nga ASEAN Summit.

Nalatid sa unang proklamasyon nga ang Dakbayan sa Lapu-Lapu ug Lungsod sa Cordova mao ang ipaubos sa special non-working holiday gikan Mayo 6 hangtod 8 apan kagahapon lang giaunsyo nga lakip na ang Dakbayan sa Sugbo ug Dakbayan sa Mandaue.

Tumong sa maong holiday aron mapadali ang pagdumala sa dagan sa trapiko alang sa panagtigom sa ASEAN Summit.

Gumikan sa ulahi nga pahibalo, daghang trabahante ang nakasugod na og panarbaho ug ang mga buhatan sa gobyerno nagsugod na sa ilang regular nga transaksyon. Daghan sab ang napugos sa pagsuspenso sa ilang trabaho tunga-tunga na sa adlaw. Usa na si Konsehal Pastor “Jun” Alcover nga mireklamo sa kalit nga pag-anunsyo sa Malacañang. Ang ubang empleyado nagbagulbol tungod kay walay klaro nga abiso ug matud pa nga kalas sa oras ug plitehan ang pagsulod sa trabaho nga isuspenso ug sa mando nga “No Work, No Pay” sulod sa tulo ka adlaw. Si Cebu City Administrator Albert Tan mipagawas og memorandum nga nagmando sa suspensyon sa trabaho sa tanang non-essential nga departamento. Giklaro ni Cebu City Mayor Nestor Archival nga magpadayon ang essential nga mga operasyon sama sa emergency response, health services, ug disaster risk reduction. Pipila ka mga tunghaan sa syudad ang napugos sa pagsuspenso sa klase sa tunga-tunga nga bahin na sab sa adlaw gumikan kay anaay mga klase nga nagsugod na sa alas 7:00 pa lang sa buntag. Gilauman nga mobalik sa normal ang klase ug operasyon sa gobyerno karong Lunes, Mayo 11. (BANAT NEWS)