Seguridad sa ASEAN Summit gipalapdan  

CEBU, Philippines — Gipalapdan sa mga awtoridad ang security preparations sa tibuok Central Visayas aron masiguro ang kaluwasan sa mga foreign delegates nga posibleng mobisita sa nagkalain-laing tourist destinations sa rehiyon atol sa 48th Association of Southeast Asian Nations (ASEAN) Leaders’ Summit ug uban pang kalihokan.

Suma pa ni ASEAN spokesperson Police Colonel Kimberly Molitas nga ang seguridad dili lamang limitado sa summit venues sa Mactan-Cebu International Airport ug kasikbit nga mga lugar, kondili giapil usab ang mga tourist spots sa Cebu ug ubang probinsya sa Central Visayas nga posibleng adtoan sa mga bisita.

Gidugang ni Molitas nga ang Department of Tourism kauban ang security forces andam sa pag-accommodate sa posibleng pagbisita sa mga foreign delegates, lakip na ang koordinasyon sa ilang itinerary ug paghatag og seguridad.

Sumala pa niya, adunay gi-deploy nga kombinasyon sa overt ug covert security operations sa mga identified tourist areas aron masiguro ang kaluwasan ug dali nga response kung adunay insidente.

Samtang mokabat sa unom ka tawo ang nasikop human nasakmit ang siyam ka mga armas atol sa pagpatuman sa gun ban nga nagsugod niadtong Mayo 4 subay sa gipahugtan nga seguridad alang sa 48th ASEAN Leaders' Summit dinhi sa Sugbo.

Base sa report sa Police Regional Office 7 (PRO-7), labing menos tulo niini ang boluntaryong gi-surrender, lima ang na-recover atol sa police response operations, ug usa ang nasakmit atol sa buy-bust operation.

Gipamatud-an sa PRO-7 nga ang sunod-sunod ug paspas nga pagpatuman sa mga operasyon nagpakita sa walay hunong nga kampanya sa rehiyon batok sa ilegal nga paghupot og armas. (BANAT NEWS)