Call center agent gidakop
CEBU, Philippines — Gipasakaan na og kaso ang usa ka 33-anyos nga lalaking call center agent sa usa ka business processing outsourcing (BPO) company tungod nga nasakpang nangawat og laptop sulod sa ilang buhatan sa Barangay Hipodromo, dakbayan sa Sugbo sayo ning semanaha.
Ang nasikop giila nga si Jayson Sarvida Capistrano taga Barangay Looc, dakbayan sa Lapu-Lapu, empleyado sa usa ka BPO company, kansang pangalan gipugngan.
Base sa inisyal nga pakisusi sa kapulisan sa Cebu City Police Office - Mabolo Police Station 4, nahitabo ang pagpangawat alas 10:50 sa kabuntagon niadtong Lunes, Mayo 4, sulod sa buhatan sa maong kompanya.
Ang gikawat nga butang usa ka unit sa laptop nga gipanag-iya sa kompanya nga nagkantidad og PHP 60,000.
Nasayran usab sa kapolisan nga sa wala pa mahitabo ang pagpangawat, si Capistrano gipatawag sa Human Resource (HR) officer sa kompanya aron motuman sa Return-to-Work Order ug mosumiter og explanation letter human siya nag-AWOL o “absent without leave” sulod sa unom ka adlaw sukad niadtong Abril 28.
Ang kapolisan gikuha niya ang usa ka laptop nga gibutang sa production floor nga walay pagtugot o pagpahibalo gikan sa kompanya.
Apan nasakpan siya sa security guard kay atol sa usa ka frisking inspection, nasuta nga gidala niya ang laptop sa kompanya hinungdan nga kini gidakop.
Niadtong Martes, Mayo 5, si Capistrano gipaubos sa inquest proceedings ug gipasakaan dayon og kasong Qualified Theft. (BANAT NEWS)
- Latest
