Bata naalaang asset gikulata

CEBU, Philippines — Gipangita karon sa kapolisa sa Lapu-Lapu City ang duha ka mga lalaking kalit nga nikulata sa usa ka 16-anyos batan-ong lalaki nga ilang naalaan nga police asset samtang kini naglakaw sa dalan diha sa Sitio Mantawi, Barangay Poblacion, dakbayan sa Lapu-Lapu niadtong miaging semana.

Ang menor de edad nga biktima giila lang sa pangalan nga alyas "JB", residente sa nahisgutang dakbayan. Samtang gipugngan sa mga otoridad ang mga pangalan sa duha ka wala pa madakping mga suspek nga parehong mga residente sa naasoy nga barangay.

Base sa inisyal nga imbestigasyon sa Lapu-Lapu City Police Office (LCPO) - Station 3, ang insidente nahitabo mga alas 5 sa hapon niadtong Mayo 1, samtang si JB padung sa balay sa iyang uyab. Niadtong higayona, gisundan siya sa usa sa mga suspek ug kalit nga gibunalan og helmet hinungdan nga nahagba kini sa yuta. Pipila ka gutlo niabot ang ikaduhang suspek ug gihapak usab ang biktima gamit ang helmet. Ang duha ka mga suspek daling midagan palayo sa wala matinong dapit.

Tungod sa kakusog sa paghapos sa mga helmet, nakaangkon og mga bun-og sa nawong ang biktima, samtang naguba usab ang cellphone nga iyang gibitbit.

Matud sa kapulisan nga nakuha sa closed-circuit television (CCTV) ang insidente duol sa maong dapit diin madungog ang biktima nga naghilak nga nangayo og tabang.

Human masayran ang insidente pagkasunod adlaw, gilusad dayon sa mga otoridad ang operasyon ug didto nailhan ang duha ka persons of interest, kinsa gipaubos karon sa padayong pagpasaka og kaso.

Sa pakighinabi sa Banat News, si LCPO Station 3 Commander Police Major Melchor Rodriguez Jr. nisaysay nga niadtong Martes, Mayo 5, ang biktima uban sa iyang inahan nibisita sa estasyonan ug pormal nga nipasaka og reklamo batok sa mga suspek.

Dugang niya nga ang duha mag-atubang og kasong physical abuse in relation to Republic Act 7610 o ang Special Protection of Children Against Abuse, Exploitation, and Discrimination Act of 1992.

Si Rodriguez mibutyag nga mga drug personalities ang duha base usab sa pasiunang pamahayag sa biktima nga nasaypan siya nga police asset.

“Ang kanang duha target na jud na namo kay daghan kaayo mi information ana, specifically naay information usab gikan sa barangay nga among gi-confirm. For operation na unta na usab sila nakita namo sa drug list,” sigon niya sa usa ka interbyu gahapon (Mayo 6).

Dugang pa niya nga positibong nailhan ang mga suspek pinaagi sa tabang sa intelligence operatives sa estasyon, mga opisyal sa barangay, sa kuha sa CCTV footage, ingon man ang biktima mismo nga nakaila usab kanila. (BANAT NEWS)