Kapin P1M shabu nasakmit

CEBU, Philippines — Kapin P1 milyon nga balor sa gituohang shabu ang nasakmit gikan sa usa ka 29-anyos nga lalaki atol sa usa ka joint buy-bust operation sa Barangay Babag, dakbayan sa Sugbo niadtong Martes sa gabii, Mayo 5.

Giila ang nadakpan nga suspek nga si alyas "Darwin", nga usa ka high-value target nga nagpuyo sa nahisgutang lugar.

Matud sa taho sa Philippine Drug Enforcement Agency 7 (PDEA-7), nasakmit gikan kaniya ang di mominos unom ka mga pakete nga dunay sulod nga gidudahang shabu nga motimbang og 150 gramos ug mobalor og gibana-banang P1,020,000.

Nakuha usab ang buy-bust money, cellphone, ug uban pang non-drug evidence.

Ang maong operasyon gipangulohan sa mga operatiba sa PDEA-7 uban sa koordinasyon sa Cebu City Police Office - Malubog Police Station 12 mga alas 8:20 niadtong gabhiona.

Bisan pa man og wala pa siyay pasiunang record sa pagkalambigit sa drugas, gibutyag usab sa PDEA-7 nga kaya niyang maka-dispose og mokabat sa 300 ngadto sa 500 gramos nga shabu matag semana.

Kasamtangang gitanggong si Darwin sa kustodiya, samtang nagpaabot sa pagpasaka og kaso sa paglapas sa Sections 5 ug 11 sa Republic Act 9165 batok kaniya.

Samtang usa sab ka drug suspect ang nadakpan sa gihimong buy-bust operation sa kapulisan sa Sitio Kalubihan, Barangay Pardo, Cebu City niadtong Miyerkules sa kadlawon, Mayo 6, 2026, diin nakumpiskar ang gituohang shabu ug armas isip kabahin sa anti-illegal drugs operation.

Ang suspek giila nga si Dionisio Dimakiling Macaraya alyas “Jimboy,” 48 anyos, tricycle driver, ug residente sa Barangay Pardo, Cebu City.

Nadakpan siya sa operasyon sa mga operatiba sa Regional Police Drugs Enforcement Unit 7 (RPDEU7) kauban ang mga personnel sa Police Station 7, Cebu City Police Office, ug ubos sa koordinasyon sa Philippine Drug Enforcement Agency (PDEA) Region 7.

Nakumpiskar gikan sa suspek ang usa ka sachet nga gituohang shabu nga maoy subject sa sale, duha ka dugang nga sachets sa parehas nga gidudahang droga, usa ka .38 caliber revolver nga adunay marka nga “Smith and Wesson” apan walay serial number, ug mga bala.

Lakip usab sa nakuha ang buy-bust money n coin purse nga gituohang gigamit sa pagtipig sa illegal drugs.

Gibanabana nga 15 gramos nga gituohang shabu nga gibanabanang balor  P102,000 ang nasakmit gikan niya.

Ang mga mga dinakpan pasakaan og kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.— Shiela Mae Agrabio, Romeo D. Marantal (BANAT NEWS)