Sobra 3,000 nadakpan

CEBU, Philippines — Moabot og sobra 3,000 ka mga tawo ang nangadakpan ug naa nilay gipamulta tungod sa paglapas sa mga lokal nga ordinansa sa Cebu City atol sa pito ka adlaw nga implimentasyon sa Cebu City Police Office (CCPO) sa Safer Cities Initiative.

Ang gipatumang mga operasyon naglakip sa Oplan Bulabog, Oplan Bakal Sita, ug Oplan Pakigsandurot gikan Abril 27 hangtod Mayo 3, 2026 nga gipamunoan ni City Director Police Colonel George V. Ylanan.

Ang CCPO nakahimo anang mga adlawa og 486 ka operasyon nga niresulta sa pagkasikop sa 415 ka tawo tungod sa pag-inom inom sa pampublikong lugar, 277 sa pagpanigarilyo sa pampublikong lugar, 391 nga naghukas-hukas, ug 606 ka curfew violations nga naglambigit og mga menor de edad.

Natala usab ang 20 ka kaso sa karaoke operations nga milapas sa gitugot nga oras, 14 ka vandalism incidents, ug 1,436 ka paglapas sa City Traffic Ordinance.

Aduna usab pito ka uban pang violations sa lokal nga ordinansa, samtang walay natala nga illegal structures o road obstructions. Sa kinatibuk-an, 1,499 ka mga violators ang gipamulta, samtang 1,667 ang gipang-warningan.

Ang target sa Oplan Bulabog mao ang pagpangdakop sa mga indibidwal nga nalambigit sa ilegal nga kalihokan sama sa droga ug uban pang krimen.

 Ang Oplan Bakal Sita, nitutok sa pagpatuman og checkpoints ug inspeksyon sa mga sakyanan aron masuta ang ilegal nga armas ug mapalig-on ang seguridad sa kadalanan.

 Samtang ang Oplan Pakigsandurot usa ka community engagement initiative nga nagpalig-on sa relasyon tali sa kapulisan ug komunidad pinaagi sa  hiniusang pagpatrolya sa mga barangay tanod kauban ang mga polis diha sa kabarangayan.

Ang implimentasyon sa Safer Cities Initiative pamaagi ni sa Department of Interior and Local Government nga mamentinar ang kalinaw ug kahapsay sa mga lugar sa tibuok nasud.

Ang pagpangusog sa implimentasyon  niini makatabang sab sa paninguha sa kapolisan sa rehiyon nga mamahimong malampuson ug luwas nga mapahigayon ang ASEAN Summit nga gihimo karon dinhi sa Sugbu, particular sa Dakbayan sa Lapu-Lapu.— IBM BANAT NEWS