State of Calamity sa probinsiya gilibkas na

CEBU, Philippines — Human sa pipila ka bulang gipaubos sa state of calamity, opisyal nang gilibkas sa Probinsya sa Sugbo ang maong deklarasyon human sa duha ka sunod-sunod nga kalamidad nga niigo sa miaging tuig.

Giaprubahan sa Sangguniang Panlalawigan sa Sugbo ang resolusyon atol sa ilang regular nga sesyon niadtong Lunes, Mayo 4, pinasikad sa mosyon nga gihimo ni Board Member Lakambini G. Reluya.

Ang paglibkas sa state of calamity gibase sa rekomendasyon sa Provincial Disaster Risk Reduction and Management Council (PDRRMC) nga miingon nga nahimutang na sa normal ang kahimtangan sa kadaghanan sa mga lugar sa probinsya.

Sa ilang assessment, gipadayag sa PDRRMC nga andam na ang Sugbo sa pagbalhin gikan sa emergency response padulong sa recovery ug rehabilitation phase.

 Ang maong rekomendasyon gipormal pinaagi sa PDRRMC Resolution No. 002-2026 nga gipetsahan Abril 1, 2026.

Gipasabot ni Reluya sa iyang resolusyon ang importansya sa pag-alsa sa deklarasyon aron “restore normal governance operations and facilitate long-term development initiatives.”

Ang state of calamity unang gideklarar human sa kusog nga magnitude 6.9 nga linog niadtong Septiyembre 30 ug ang Bagyong Tino niadtong Nobyembre 4 sa miaging tuig.

Ang duha ka kalamidad nagbilin og mga kadaot sa imprastraktura, nakaapekto sa panginabuhian sa mga residente, ug nakapapahawa sa liboan ka mga pamilya sa nagkalain-laing dapit sa Sugbo.

Sumala sa Post-Disaster Needs Assessment (PDNA), mokabat sa P19.28 bilyones ang gikinahanglan alang sa rehabilitasyon sa northern Cebu pa lamang, wala pa labot ang kadaot nga dala sa Bagyong Tino.

Ang linog nagbilin og P9.24 bilyones nga kadaot ug dako nga P47.74 bilyones nga kadaut gikan sa nagkalain-laing sektor.

Pinakadako ang naangkon nga kadaot sa social sector nga miabot og P4.05 bilyones. Sa imprastraktura P1.98 bilyon ang danyos sama sa mga dalan, tulay, pantalan ug uban pang kritikal nga pasilidad.

Sa productive sector, lakip ang agrikultura, pangisdaan, turismo ug negosyo, naitala ang P718 milyones nga kadaot apan niabot sa P9.52 bilyones ang epekto tungod sa pagkabalda sa ekonomiya.

Ang linog mikalas og 79 ka tawo ug nakaangol og 1,271 ka tawo, samtang ang Bagyong Tino  nikalas og 96 ka tawo  ug 1,836 nasamdan sa probinsya sa Sugbo.— IBM BANAT NEWS