P19.6M shabu nasakmit

CEBU, Philippines — Kapin sa P19.6 milyones nga balor sa ilegal nga drugas ang nasakmit samtang sobra sa 500 ka tawo ang nasikop atol sa usa ka semana nga gipangusgan nga operasyon sa kapulisan sa Central Visayas bisan pa man sa nagpadayon nga pagpangandam sa  Police Regional Office 7 (PRO-7) alang sa seguridad sa umaabot nga ASEAN Summit 2026.

Gikan Abril 26 hangtod Mayo 22, nasakmit sa PRO-7 ang kinatibuk-ang 2.9 kilos nga gituohang shabu ug 11.45 gramos nga pinaugang dahon sa marijuana nga gibanabana nga mobalor og P19,667,096 atol sa anti-illegal drug operations.

Atol sa operasyon, di mominos 229 ka mga durugista ang nadakpan usab sa nagkadaiyang lugar sa tibuok rehiyon.

Dugang pa, 91 ka mga indibidwal usab ang gidakop tungod sa mga kalapasan batok sa ilegal nga armas, human nakumpiska sa kapulisan ang labing menos 78 ka loose firearms ug 108 ka mga bala. Samtang, ang nagpadayon nga manhunt operations sa PRO-7 nisangpot usab sa pagkasikop sa 138 ka mga wanted persons.

Ang 31 nila mga most wanted persons, nga naglangkob sa unom gikan sa regional-level, siyam gikan sa provincial-level, duha sa city-level, ug 14 ka municipal-level nga mga pugante. Sumala pa ni PRO-7 acting director Police Brigadier General Arnold Abad, magpadayon ang pasalig sa kapulisan sa rehiyon alang sa kaluwasan sa publiko samtang ang rehiyon nangandam usab sa pag-host sa usa ka dakong internasyonal nga kalihokan.

 Niadto lang nakalabay nga gabii, upat ang nadakpan sa nagkalain-laing anti-drug operations nga gipahigayon sa Cebu City Police Office (CCPO) sa gipalig-on nga Simultaneous Anti-Criminality Law Enforcement Operations (SACLEO). Ang sunod-sunod nga operasyon gipangulohan ni City Director PCOL George Ylanan, nga nagtumong sa pagpakusog sa kampanya batok sa ilegal nga droga sa dakbayan. Ang upat nangadakpan gikan sa Sitio Ermita Proper, Barangay Ermita; Sitio Feathers, Barangay Day-as ug Sitio Looban, Barangay Tejero.

Ang PDEA Regional Office 7 kauban ang mga sakop sa CCPO – Police Station 9, naghimo og buybust operation diha sa Sitio Susco, Barangay Guadalupe, kagahapon ug nadakpan si Jovito Montilla Toquero Jr., 27, human nakuhaan og 125 gramong gidudahang shabu nga mokantidad og P850,000. (BANAT NEWS)