Gisuspenso og 30 ka adlaw

CEBU, Philippines — Gisuspenso og 30 ka adlaw sa Land Transportation Franchising and Regulatory Board (LTFRB) ang prangkisa sa usa ka traditional PUV nga maong nakaingon sa nahitabong aksidente niadtong Mayo 1, 2026 nga miangol og 18 ka pasahero sa Cebu City

Ang desisyon sa LTFRB gipagawas human sa gihimo nilang imbestigasyon sa maong aksidente nga nahitabo diha sa eskina sa dalan D. Jakosalem ug V. Gullas streets.

Matud pa ni LTFRB Chairman Atty. Vigor D. Mendoza II, basi sa ilang inisyal nga nakita, giingong tungod sa “recklessness” sa usa sa mga driver sa pasaheroan ang hinungdan sa maong aksidente base palang sa kuha sa CCTV footage sa lugar nga nikatap sa social media.

“The incident showed disregard of basic traffic regulations and road safety rules. The video footage will be strong evidence in the conduct of the investigation,” matud pang Mendoza.

Nakita sa CCTV footage nga ang usa sa mga passenger jeepney ang pugsanong nilahus bisan og pula pa ang traffic light maong napunggit kini sa laing pasaheroan.

Tungod sa kakusog sa pagbangga, natumba gyud kini ug niresulta sa pagkaangol sa mga pasahero. Nipagawas dayun og show cause order si LTFRB Regional Director Abosamen Matuan batok sa operator o drayber sa maong jeepney nga natumba aron paesplikahon nganong dili puydeng suspensuhon o kanselahon ang ilang Certificate of Public Convenience.

Gimandoan sab ang operator nga ipa-surrender ang driver’s license sa iyang jeepney driver nga nalambigit sa maong aksidente, apil sab ani ang license plate details.

Dunay hearing nga pagahimuon bahin ani karong Mayo 18. Gimandoan sab ni Mendoza si Matuan nga kinahanglang atimanon ang mga nangaangol nga pasahero apil ani ang paspas nga pagproseso sa insurance claims ug assistance. — /IBM (BANAT NEWS)